Un Mama: Husticia a “secuestra” mi yiu mand’e Corsou

Diaranson mainta dilanti Corte, un mama a denuncia cu su yiu a wordo secuestra door di husticia y mand’e pa Corsou y sin cu el a haya chens di papia, corda despedi di dje.

Ireida Jones a acudi na Corte pa un caso di su yiu, y eynan el a bin tende cu su yiu mes no lo presenta pasobra a mand’e Corsou. “Si mi yiu no ta bek den un siman di tempo, e caso aki ta bay mas leu,” sra. Jones a cuminsa pa declara. E señora tambe a reclama riba e situacion den KIA cu no ta uno drecho, unda cu e presonan ta wordo trata manera cacho, siendo cu nan ta ser humano.  “Nos cu ta mama mester habri boca, pasobra e cosnan no por sigui asina.”

E yiu mester a presenta den Corte luna pasa, unda a wordo bisa cu mester mand’e Corsou pero no tin placa. Awe, diaranson cu e mester a bay dilanti mesa berde atrobe, di repente ta bin tende cu a mande Corsou, cu di repente tabatin placa. Supuestamente awe mester a bay Corte pa dicidi si ta manda e yiu Corsou of no. “Pero nan a coge mand’e sin cu nos a wordo avisa. Via via nos a tende cu el a bay Corsou. Con por ta, si e decision mester a tuma luga awe,” e padrastro di su banda a bisa.

Mama Ireida Jones: Awe Husticia a secuestra mi yiu den KIA manda Curacao

Posted by 24ora on Wednesday, August 14, 2019

Ta parce cu den KIA a tira un razia, unda e yiu a haya un bati y despues a dun’e un hangua cu a lague completamente off. Esaki tabata pa calm’e. “Nos no sa ki sorto di hangua a dun’e. A djis dun’e esaki pa calm’e y hib’e Corsou pasobra e no tabata kier a bay.”. Su yiu, segun e mama, a sinta su castigo caba y p’esey nan no ta compronde cu a mand’e afo. Esey ta demostra cu e presonan no tin bos den KIA, “nan ta simplemente manera cacho. Mester para e cos aki.” Tabatin hende cera pa e mesun caso cu tabata cera y a sali caba.

Pa colmo na Corso e yiu no tin ningun famia cu ta bay bishit’e. “Nos ta hende pober, nos no por bay Corsou,” e padrastro a comenta. E yiu mes no tabata kier a bay pasobra, e kier a drecha pasobra e ta unico hende pa e mama.

Ayera nan “a deporte sin cu mi por a papia cun’e. Mi no ta bay keda cu wowonan ni mi boca cera tampoco den e caso aki,” e mama a termina bisando.

Abogado Carlo a splica cu recientemente un psychologo di mucha a cuminsa traha den KIA, cu no tabatin. Net nan a cuminsa trata e hoben y el a mira un cambio den e hoben pa awo di repente coge mand’e Corsou.

 

Comments

comments