Un luna completo di lesamento pa mucha

Stichting Kids Creation Center ta presenta Les-A-Thon 2021. For di 01 di november te cu 30 di november 2021, un grupo di maximo 200 mucha entre 0-12 aña por participa na e proyecto educativo y recreativo Les-A-Thon. Den colaboracion cu Scol Amplio Nos Cosecha, Biblioteca Nacional y Asociacion Trabao Di Hubentud Na Aruba (ATHA) a prepara e proyecto den cuadro di apertura di Siman di Buki y tambe pa celebra Dia Nacional Di Mucha y Dia Internacional Di Derecho Di Mucha cu enfoke riba articulo 17 di tratado di derecho nan di mucha; ‘tur mucha tin e derecho di tin acceso na informacion for di diferente fuente, manera buki”.

Les-A-Thon ta un proyecto cu ta promove lesamento y amor pa lesa na un manera innovativo, yena di goso, ambiente y alegria.

Ta invita famianan na Aruba pa participa na e marathon di Aruba su Les-A-Thon dor di registra via e link riba pagina di Facebook Scol Amplio Nos Cosecha. Cada famia cu registra, ta ricibi un pakete y e lista di aventura cu ta duna manera nan yen di goso cu por scoge cada dia pa lesa.

Evento special di lesamento pa mucha

Posted by 24ora on Tuesday, October 26, 2021

Cada famia/ mucha registra, ta participa pa lesa 30 dia. Cada dia ta lesa minimo 15 minuut. E famia ta graba e momento di lesamento y subi e video den un folder di e famia /mucha via un e-mail adres asigna cu lo ricibi na momento di registracion. Tin diferente premio pa famia /mucha cu participa.

Comunidad di Aruba por sigui e desaroyo di e cantidad di minuut lesa cada dia via 24 ora.com cu lo mantene e pueblo informa.  Tur compania y persona cu ta desea di sostene e proyecto por tuma contacto na number di celular 567-0521, bishita nos pagina di facebook: Scol Amplio Nos Cosecha of e-mail: [email protected]