Diasabra. Cas di Cultura lo presenta su programa anual Schubert in One Musical Island cu e obra Schubert Octet in F Major D.803 toca pa un grupo cu artista di 5 pais aclama internacionalmente.
Kozuhiro Takagi, violinista di Hapon lo debuta cu e festival. E otro violinista ta e Colombiano Federico Hoyos, profesor di fio na dos diferente universidad na Bogotá.
Randolph Kelly ta e tocado principal di viola cu e mundialmente famoso Pittsburgh Symphont Orchestra cu a caba di gana un Grammy. German Marcano ta un cellista Venezolano hopi popular na Aruba despues di varios presentacion na Cas di Cultura. Sr. Marcano a ricibi su educacion formal na Univerdidad di Surrey, Inglatera. George Amorim ta Profesor di Baho na Universidad di Texas y a caba di bolbe for di un convencion di International Bassist Organization teni na Jacobs School of Music di Indiana University na Bloomington, Indiana.
Ta for di e scol aki e clarinetista Venezolano Jorge Montilla a gradua despues di studia bou di Howard Klug. Joel Arias ta un maestro di e instrument corno moderno. E ta profesor di corno na Universidad di Panama. El a toca solo y den grupo na hopi pais di Europa. E ultimo di e octet ta Benjamin Coelho, fagotista original di Brazil kende awor ta profesor di fagot na Universidad di Iowa.
Un coleccion asina di artista na nivel mundial no ta toca na Aruba hopi biaha. No perde e oportunidad aki. E concierto ta cuminsa 8PM. Entrada ta gratis.
Diadomingo. Concierto di Clausura cu Aruba Symphony Orchestra y Kazuhiro Takagi.
Cu Simon Gollo, e director di Aruba Symphony Festival cu e batuta den man, Aruba Symphony Orchestra lo clausura e fiesta musical di e aña aki presentando dos obra di Mendelssohn: Violin Concerto den E menor op.64 y Symphony No. 4 den A mayor op. 90. Kazuhiro Takagi lo ta e solo violinista. Mr. Takagi ta un violinista cu a yega di sirbi como “koncertmeester” di cuater orkesta na tres diferente pais. Ela a toca como solista y den grupo di camara na Europa y Merca ademas di na su pais natal, Hapon.
Simon Gollo a nace na Venezuela pero el a ricibi su formacion musical na Suissa y e awor ta un ciudadano Suissa. Simon a haya un invitacion pa bay toca y duna les di fio na China e aña aki na october. Esaki lo ta di 24 pais caminda Simon lo a actua como musico den su carera ilustro. E tabata e fundador di e super exitoso Nuevo Mundo Festival cu a funciona na Maracaibo di 2000 te cu 2012, tempo cu a bira demasiado peligroso na Venezuela. Simon Gollo su amor pa Aruba ta data di aña 2006 cu el a duna un concierto gratuitamente pa recauda placa pa Aruba Scholarship Foundation. Su soño awot ta pa Aruba Symphony Festival bira e festival di musica clasico mas importante di e region Caribe.
Sin duda, e concierto final di Aruba Symphony Festival ta e evento di musica clasico mas anticipa den e region Caribense y entrada ta solamente $20 of 35 florin. E concierto ta cuminsa 8PM. Bin tempran pa bo no tira den bashi.
