Un rato pasa, despues di e conferencia di prensa yama pa Gobierno di Aruba, a probecha entrevista minister-president mr. Evelyn Wever-Croes. Como cu awa tabata yobe, a entrevist’e bou paraplu, net band’i su auto.
Gobierno a anuncia un conferencia di prensa, pero sin prensa presente den sala. A transmitie via e canal estatal, TeleAruba y via Facebook. Sinembargo, siendo e #PromeDenNoticia, nos a habri e transmicion di pafo y despues a warda e prome mandatario pafo banda di su auto pa un comentario extra pa e mayoria di e pueblo cu ta sigui tur noticia via 24ora.com.
Nos colega Brian Koolman a entrevista Prome Minister, cu Elton Malone como camaraman, mientras cu colega Theodoor de Jongh a opta pa bin cu e paraplu pa sigura cu MinPres ta keda seco y asina e entrevista por a bay sin problema.
Si tur cos bay bon, aki rato pa 10:00 pm lo tin un siguiente conferencia di prensa cu informacion actualisa riba e mal tempo. Pero, e prome mandatario a sigura cu e pronostico ta resulta cu e mal tempo ta menos serio di locual e imagina y cu mas bien e lo keda na poco awasero y eventualmente cu poco biento.
