Un di e salanan di IMAX mas moderno den Caribe: A inaugura centro di entretenimento “Gloria”

“Boso no por imagina e honor cu ta toca ami awe pa ta para aki, na ocasion di apertura di un di e complehonan di cine di mas moderno den henter nos region. Mi bisawelo probablemente no a imagina cu awe su bisanieto ta para na e ocasion special aki, continuando cu e mesun negoshi cu nos a inicia exactamente 100 aña pasa”, asina Eddie de Veer, director di MetaCorp a inicia su
discurso na ocasion di celebracion di 100 aña di e compania netamente Arubiano y cu a inaugura e centro di entretenimento “Gloria”. 

Ta trata aki di un inversion grandi, di no menos cu 40 miyon florin den un compleho di pelicula, cuminda y bebida y entretenimento. “Nos a yam’e GLORIA como honor na e prome sala di cine cu nos famia a inicia hopi aña pasa. Den e edificio aki nos tin 10 auditorio di cine, parti den 1 sala IMAX, 3 sala VIP y 6 sala comfort class. Na tur nos tin 1132 stoel ora tur e salanan ta yen. Claro cu nos sala di mas grandi ta esun di IMAX, cu 284 stoel pa admira un pantaya di 71 pia hancho, casi similar na e tamaño di e pantaya di Drive In, cu ta 80 pia di hanchura”, di acuerdo cu Eddie de Veer.

Aruba tin un di e salanan di IMAX mas moderno den Caribe: MetaCorp a inaugura centro di entretenimento GLORIA – Un inversion di 40 miyon florin cu ta percura pa mas cu 200 cupo di trabou

Aruba tin un di e salanan di IMAX mas moderno den Caribe: MetaCorp a inaugura centro di entretenimento GLORIA – Un inversion di 40 miyon florin cu ta percura pa mas cu 200 cupo di trabouPa mas info: https://24ora.news/3oLutSq

Posted by 24ora on Friday, December 11, 2020

Pa awo, teniendo cuenta cu distanciamento social y reglanan di DVG, e stoelnan ta separa for di otro y e orario di operacion lo ta for di 4’or di atardi (4:00pm) pa 9’or di anochi (9:00pm). Den fin di siman, esta diasabra y diadomingo ta habri for di 10’or di
mainta (10:00am) pa 9’or di anochi (9:00pm). 

Director di MetaCorp, Eddie de Veer, bisanieto di e fundado di e compania, dirigiendo su mes na un cantidad limita di invitadonan pa celebra 100 aña di e compania y alabes inauguracion di “Gloria”, e centro di entretenimento nobo di Aruba. Un inversion grandi di 40 miyon florin den nos economia, cu na final lo percura pa riba 200 cupo di trabou.

Pero e compleho aki ta encera hopi mas cu solamente cine riba pantaya grandi. Orguyosamente a celebra tambe apertura di e restaurant mundialmente conoci, P.F. Chang’s, un cushina Chines, Japones y Thailandes. E restaurant ta capas pa carga 225
huesped. Mangiamo’s ta un restaurant Italiano, specialisa den pasta, pizza, etc. Eyden nan por sirbi 80 cliente. Sizzle lo ofrece chicken wings, hamburger, sandwich, wrap y BBQ cu posibilidad pa carga 80 huesped. Esey no ta tur, pasobra separa di e tres restaurantnan aki, ainda tin un foodcourt cu ta inclui un Starbucks, Lettuce Eat y Cold Fusion pa scoge for di dje.

Tene cuenta cu den e teatronan tambe por haci pedida di co’i come, sea prome cu drenta paden, durante e pelicula of si bo kier, nos tin un area VIP cu su mesun menu di bar y cushina. Y siendo un compleho pa famia completo, no a lubida riba e muchanan. Gloria ta ofrece un sala di mucha cu a haya e nomber di “Stay & Play” cu tur sorto di co’i hunga pa mucha, incluyendo un arcade pa weganan digital y electronico.

“Mi mester bisa cu e proyecto aki a inicia mas chikito, pero segun e tabata haya forma, mi tata Eduardo a entusiasma mas y mas y cada bes a hacie mas grandi y mas grandi y mas moderno…te cu el a bira un di e proyectonan mas moderno den henter nos region. Nos no a spaar den nada di innovacion, den e ultimo tecnologia di zonido, di imagen skerpi, di stoelnan comodo y moderno, di un bon bar & cushina y na mes momento…nos a regla un dolor di cabes cu semper nos tabatin, espacio pa parkeer”, di acuerdo cu Eddie de Veer. E compleho ta conta cu un parkeerplaats masha grandi, capas pa por staciona 325 auto eynan. 

Eduardo de Veer, presidente di e hunta di comisarionan di MetaCorp durante su discurso a enfoca cu e compania ta stabiel y cla pa bay e siguiente 100 añanan, bou liderazgo di e generacion nobo di famia De Veer. E compania lo sigui inverti den nan companianan existente, tanto na Aruba mes como den exterior tambe.

MetaCorp a gradici henter e ekipo tras di e proyecto aki, na banco cu a kere den nan, na arkitectonan cu a pinta e diseñonan moderno, na e companianan local di construccion cu a traha e edificio cu trahadonan y uzando productonan local. “Asina nos ta draai nos economia, dor di inverti na cas, uza companianan local y garantisa cupo di trabou, tanto den e periodo di construccion y despues pa traha aki den tambe”, segun Eddie de Veer.

E rumannan Eduardo, Gerardo y Albert de Veer, faltando nan ruman muhe Diana, hunto cu e generacion nobo di famia de Veer y demas ehecutivonan di e compania. Tanto algun cu a baha cu pensioen caba como tambe algun cu keto bay ta activo. MetaCorp awendia ta bou maneho di Eddie de Veer, Peter Bommel, Robert Carrasquero y Guus Slabbekoorn.

Na final, el a enfatisa cu “Como compania nos ta kere den e economia di Aruba, nos sa cu despues di temponan dificil, miho temponan lo bin. MetaCorp semper a inverti den grandi na Aruba ora mas e economia tabatin mester di dje, por ehempel ora LAGO a cera, ora di e caida di economia mundial algun aña pasa y awo, ora cu nos ta enfrentando un pandemia sin prescedente. Ta den e momentonan aki Aruba mester por conta cu su inversionistanan local pa carga e economia y lant’e bek pa progreso y bienestar di nos tur”, Eddie de Veer a termina bisando durante su discurso dilanti mandatarionan, accionistanan di e compania y invitadonan pa celebra apertura di e centro nobo di entretenimento di Aruba.