Un chauffeur burachi menos riba caminda

663

Manera Polis a avisa adelanta, a lrganisa varios control den fin di siman relaciona cu stuurmento di auto burachi. Ultimo tempo esaki ta lantando cabes atrobe y ta topa varios caso di accidente di cual un di e partidonan ta burachi.

E asunto aki ta bay mas leu pasobra hopi biaha companianan di seguro ta bira mas estricto ora ta trata di chauffeur burachi pasobra den nan reglanan ta stipula cu no ta cubri accidentenan di cual e chauffeur ta burachi, pasobra pa ley e chauffeur no mag ta den trafico mes!

Cu e realidad ey den mente, Polis a para un auto pa un control rutinario diadomingo marduga alrededor di 2:30am dilanti 297 Restaurant den e area di “South Beach”.

Ta trata aki di un auto marca Hyundai modelo Getz, color blauw, cu number A-55662. E chauffeur tabatin un lenga pisa, pero toch pa verifica a lage supla y e test a sali malo pe. Es mas, e resultado a indica cu e tabatin un nivel hopi halto di alcohol den su rosea.

Polis a detene na e sitio mes y a laga transport’e pa Warda di Polis di Noord pa e por descansa su curpa den un cel. Tambe ey Fiscal Auxiliar ta dicidi kico lo sosode cune, por ehempel por kita su rijbewijs for di dje te dia su caso bin dilanti Corte pa dicidi si ta kit’e pa un tempo of kit’e pa semper!