Un usuario a logra capta e potret unico aki cu ta papia mas di un palabra. E scenario ta describi adultonan gozando di un banda musical tocando, probablemente cu speakernan duro, mientras un Polis pasando riba e ruta ta zak, ta bisti e criatura un earplug. E mucha ey para no tin un idea di e daño cu e zonido duro por tin pa su oido awo y den futuro. E mucha tabata asina orguyoso cu un Polis a papia cune y dune un “regalo”. P’e e Polis ey awo ta su heroe…pero den nos bista tambe!
E Polis en cuestion ta Patricia Westerhof, cu tabata encarga cu mantencion di ordo publico riba e ruta di carnaval. Cu e potret aki ta mustra e “otro banda” di e trabou di Polis. Mucho biaha ta enfoca solamente riba e actuacion pisa den cuadro di mantencion di ordo publico. Poco biaha ta enfoca riba e trabou social, e man di compasion y e ehempel cu mester duna na comunidad y na e futuro generacion.
Lamentablemente ni maske cuanto a promove uzo di “earplugs” prome y durante paradanan di carnaval, specialmente pa protega oido di e muchanan, toch lamentablemente hopi mayor ainda no ta pone atencion y cuida oido di nan yiunan.
Ta di spera cu e accion di e Polis Patricia Westerhof por sirbi como un inspiracion pa otro mayornan y na pueblo henter, cu ta tuma henter un comunidad pa lanta muchanan awendia. E mayornan a sigura cu a cumpra earplug di trempan pero e mucha mes lo a sak’e di su orea. Ban nos tur duna e miho ehempel pa crea un generacion nobo di lidernan cla pa hiba nos isla na e siguiente nivel di desaroyo y crecemento!
