Diahuebs net prome cu 2:00PM un biaha mas a sosode un accidente na e crusada di Palm Beach. E Nissan March numera A-67988 tabata bin for di Wendy’s y e Nissan Leaf numera A-27716 tabata bin di Marriott bayendo direccion Playa. Ya caba pa algun siman e luznan di trafico di e crusada di Palm Beach no ta trahando.
Pa falta di preferencia e accidente fuerte aki a tuma luga. Ambos auto a ricibi hopi daño material. Strandpolitie a yega na e sitio pa dirigi e trafico. Polis di trafico tambe a yega na e sitio y a tuma e declaracionnan di ambos chauffeur, pa asina haya sa kico tur a pasa.
Tambe a pidi asistencia di ambulance, pasobra esnan envolvi den e accidente tabata keha di dolor. Na yegada di ambulance, di biaha e paramediconan a cuminsa papia cu e pasahero di e Nissan March pa haya sa mas unda tur e ta keha di dolor. A hinca e pasahero den ambulance pa sigui cu e proceso di controla.
