Ultimo dia di trabou di Theo de Jongh na Aruba Tourism Authority

1618

Di forma unico, su coleganan a tapa su wowo y a hib’e un luga desconoci pe. A yega cu ne Cas di Cultura na unda coleganan y famia tabata sperando riba dje pa despedi di dje di un forma unico, creativo y ecomocional. A hacie eyden pa motibo di reglanan di distanciamento social. Theo de Jongh awor lo disfruta di su pensioen bon mereci, pasando mas tempo cu su tata na Boneiro, piscando mas y tumando bida mas facil.

Diabierna ultimo Aruba Tourism Authority (ATA) a despidi di Theo de Jongh, despues di a traha casi cuarenta aña den turismo. El a haci esaki den diferente faceta di e evolucion di oficina di turismo di Aruba. A cuminsa cu departamento di gobierno hopi aña pasa y te awo den ATA como formato di identitad independiente.

Ultimo dia di trabou na Aruba Tourism Authority: Theo de Jongh a baha cu pensioen despues di dedica casi 40 aña na turismo

Ultimo dia di trabou na Aruba Tourism Authority: Theo de Jongh a baha cu pensioen despues di dedica casi 40 aña na turismo

Posted by 24ora on Sunday, October 25, 2020

CEO di ATA, Ronella Tjin Asjoe-Croes, a gradici de Jongh p’esey y a dese’e tur cos bon cu su pensioen. No por a laga e dia bay sin mas y a gradici e team di ATA p’e iniciativa pa crea algo asina grandi y special pa Theo y su famia. Aruba Tourism Authority, tanto local como internacional ta desea Theo y su famia tur cos bon y ta gradicie pa e trabou desplega den hopi faceta y disciplina pa turismodi Aruba y oficina di turismo.

Theodoor Jose de Jongh, naci na Aruba dia 12 di mei 1957, a cuminsa su carera na Directie Toerisme dia 11 di januari 1981. Si el a sigui traha tres luna mas, e lo a alcansa 40 aña di servicio directo den turismo di nos pais. Riba e foto e ta para banda di Chief Executive Officer di Aruba Tourism Authority, Ronella Tjin Asjoe-Croes, durante un evento special pa yam’e danki y dese’e un bon pensioen.

Den un mensahe comparti pa Tjin Asjoe-Croes, el a conta e historia di de Jongh y di su vinculo cu Boneiro. Theo de Jongh ta un persona cu a biba henter su bida aki na Aruba, pero tin famia na Boneiro y tin hopi laso cu nos isla ruman. Durante su discurso, CEO di ATA a subraya riba e toke Arubiano y Boneriano, di cual semper e dos isla a bay bon cu otro.

Theo de Jongh ta casa cu Rosemary de Jongh-Arendsz y tin dos yiu. Nan ta Zyndraina y Theodoor de Jongh. Tambe e tin un nieto, cu ta masha pega cu ne tambe.

No solamente e papel cu Theo de Jongh a hunga den e parti estadistica y analisis cu ta asina clave no solamente pa ATA, pero gobernacion y socionan den turismo. Tambe e trabounan desplega den diferente area di evento pa Aruba, maneho di prensa, encabesa diferente comision mara na eventonan grandi di Aruba. Theo de Jongh ta multifacetico y ATA ta orguyoso di conta cu hendenan asina.

Theo de Jongh den su palabranan final a gradici tur hende y a conseha nan pa sigui traha pa Aruba. Nos isla ta conoci pa semper ta bounce back mas duro y e no tin ningun duda cu den e crisis cu nos ta awo, cu na final, Aruba lo sa di recobra nos turismo atrobe. El a pidi tur colega pa sigui ofrece e miho di nan mes na bienestar y desaroyo di nos turismo. Aruba ta bendiciona cu talentonan y conocemento den e industria aki, banda di facilidadnan y rikesanan natural cu nos so por ofrece na turistanan cu ta scoge Aruba pa relaha y disfruta.