Ultimo contratista saliendo di CITGO fin di luna aki

S & L General Contractors, situa na Meiveld 1-O a ricibi un carta recientemente di CITCO Aruba Refinery den cual ta informe cu su relacion di trabou ta termina entrante dia 27 di februari 2019. Mirando cu esaki ta den algo mas cu dos siman, e compania a informa CITGO cu leynan laboral di Aruba ta exigi cu mester paga trahadonan 2 luna ora di termina un contract di trabou. Na final e compania a logra negocia pa toch cobra 1 luna adicional di salario for di CITGO.

S&L General Contractor ta existi desde september 1992 y ta opera bou maneho di e conocido Larry Nedd. E carta cu e contratistanan ta hayando ta casi igual, den cual ta anuncia paro di e acuerdonan debi na sancionnan di Gobierno Mericano.

Mester menciona cu por lo menos 16 empleado lo perde trabou dor di e decision abrupto aki. Mayoria ta Mericano y ta ingenieronan di planta di refineria, un grupo elite cu ta gana como $80 pa ora di trabou. Nan lo mester regresa nan pais otro luna caba, pasobra trabounan den refineria ta paralisa te ora yega na un acuerdo emtre Gobierno di Merca y Gobierno di Venezuela y/of PDVSA.

E situacion aki dia pa dia ta birando mas serio na CITGO Aruba Refinery. Mayoria contratista a sali afo di hopi siman pasa caba. Esun aki por ehempel a drenta apenas 6 luna pasa y awor mester sali caba debi cu no por sigui paga pa e trabounan mas.Ta pensa cu mientrastanto lo uza e empleadonan di CAR mes pa sigui wanta e planta den operacion minimo. Den caso cu esey no ta logra, lo mester pidi RdA mes pa bula aden cu trahado, pa por lo menos garantisa cu FMSA por sigui almacena combustibel den tankinan na CITGO Aruba mes.