Turistanan cu tristesa ta bandonando Aruba debi cu tanto e isla como e.o. Merca a cuminsa cera nan fronteranan.
Na aeropuerto di Aruba a topa cu basta turista cu ta preparando pa bandonando e isla. Esaki nan no ta hacie cu mucho gana, pasobra nan a pasa dianan hopi dushi riba e isla. “Danki pa laga nos pasa dianan hopi dushi riba e isla,” un di nan a expresa.
E hendenan di Aruba, nan a bisa, ta hopi agradabel pa atende cu e bishitantenan, dispuesto pa contesta tur pregunta of busca informacionnan. “We will be back,” un famia a grita den coro na nan despedida.
E grupo tabatin seis dia na Aruba y a expresa cu e miho cos pa haci ta pa cera frontera, manera Gobierno di e isla a haci. “E ta duro pa e economia, pero ta algo cu mester haci,” e turista di Philadelphia a expresa.
Pa loke ta e medidanan tuma riba e isla, un di e damanan a expresa cu nan ta spera cu ta haciendo algo aki pa preveni. E ta hopi duro riba e economia, mirando cu a cera e fronteranan. Tur hende mester traha y hasta vakantie mester a kibra. Ta desea tur hende tur cos bon, segun Rose Bard for di Pennsylvania.
Un otro famia di Boston a haya nan mes obliga di coy un vuelo pa bay bek Merca, mirando cu lo cancela tur vuelo pa Merca. Algo cu sigur ta preocupa e famia aki. Apesar di tur cos, nan a sa di disfruta di nan vakantie. Nan ta turistanan cu tin timeshare na Aruba y cu tur aña ta bin pa pasa nan vakantie. Caminda nan tabata keda, segun Karen, mester di mas informacion pa e turistanan.
Ta reaccion cu varios di nos bishitantenan a haci den e situacion fastioso cu tin rond di e brote di coronavirus y cu ta lamenta cu nan mester a corta nan vakantie. Algun di nan a bandona Aruba net na ora y ta opina tambe cu nan ta haciendo e cos corecto pa cera e frontera pa asina preveni e propagacion.
