Riba medionan social ta circulando un video, caminda un turista ta mustra con un conocido personahe cu ta cana riba beach, bende cacho, ta hinca e cachonan den bahul di su auto. Ta un acto cu e turista a critica masha tanto, mirando cu esey ta considera como maltrato di bestia.
Y naturalmente cu nos clima calor y e cantidad di oxigeno cu tin den e bahul di e auto, e puppiesnan aki por muri den un rato di ora.
Minister Dangui Oduber tambe a condena e hecho aki y a duna su comentario al respecto.
For di hopi tempo caba ta hayando keho riba e persona aki cu diariamente ta frecuenta riba e beachnan di Palm Beach cu un gran cantidad di cachonan lief.
E ta haciendo negoshi cu e cachonan aki y a haya un video cu ta circula riba rednan social di un turista cu a graba e persona aki, poniendo tur e cachonan den un bahul, sera tur e cachonan aki cual ta considera hopi repudiabel.
Sigur esaki ta considera como maltrato di bestia y sigur gobierno sa di tuma accion. Tabata atendiendo cu e caso aki pa evita e persona aki, prohibi e persona aki cana riba beach cu tur e cachonan aki pasobra no ta e imagen of señal cu kier duna nos turistanan.
Gobierno mes ta atende cu e problematica cu cachonan riba caya, cual pa añanan largo no tabata tin atencion p’e. A forma un comision pa atende cu e problematica aki.
Pa prome biaha ta bay cera e asina yama killcage. Ta bay converti den un dog act shelter y ta pesey ta lamenta loke a sosode. E minister a sigui splica cu ta pesey como gobierno, hunto cu minister di husticia lo sa di tuma accion contra e persona aki. E ta un imagen completamente robes cu e persona aki ta manda pa nos bishitantenan.
Mas condenabel ta cu den e caso aki ta net un turista a graba e persona aki ta haciendo e acto hopi condenabel aki. E minister ta garantisa comunidad cu ta bay atende cu esaki cu man duro, pa evita cu e persona aki ta sigui maltrata e bestianan aki manera e ta bin ta haciendo y exponi pa e turista.
E sa bira fastioso
Nos a ricibi comentarionan cu e persona aki en berdad tabata bende cacho riba beach, pero semper ta cana cu e cachonan y ta cobra hende pa saca potret cu nan. Tambe aparentemente e sa bira fastioso ora cu reclame.
Tambe loke a bin compronde cu semper e ta hinca su cachonan den auto, pero pa ki motibo net e dia ey el a hinca nan den bahul, no ta conoci. Ainda e persona aki ta cana riba beach cu su cachonan y si ta berdad gobierno ta na altura di e caso, no ta mira cu no ta haciendo nada pa evita esaki.
