Turista di 24 aña a bira e di 6 morto den trafico pa e aña aki

29132

Diasabra anochi alrededor di 11:10pm polis a hay’e ocupa cu’n accidente riba Watty Vos Boulevard na e rotonde di Bushiri/Madiki. Na yegada di e prome unidad hunto cu 24ora.com, a bin topa cu un auto marca Hyundai modelo Accent, numera V-3963 color blanco, pues un auto di huur.

E auto tabata biniendo for di p’ariba y pa un motibo of otro a accidenta riba e rotonde. Investigacion lo saca afo con e accidente a tuma luga.

Tabatin cuater persona den e auto, dos ta hende homber y dos ta hende muhe. E tres pasaheronan den e auto a resulta levemente herida, mientras cu e chauffeur femenino tabata mas critico. Nos a logra entrevista un testigo despues di e accidente. El a conta cu a logra saca dos pasahero pero e otronan tabata mas grave. Nos a confirma su version ora cu e prome patruya di polis cu  yega na e sitio a laga sa cu e chauffeur casi no tabatin pulso mas. 

Accidente pisa riba rotonde Bushiri. Persona serio herida y basta daño material

Posted by 24ora on Saturday, November 28, 2020

Mesora a activa tur e instancianan concerni, entre otro brandweer, ambulance, polis di trafico y polis forensico. Brandweer hunto cu materialenwagen ta e prome nan cu a yega na sitio, a logra saca e di tres victima for di e Accent pero no por a haci mucho pa e chauffeur. Un total di tres unidad di ambulance a presenta na sitio y a transporta dos hende homber y un hende muher pa hospital p’asina ricibi atencion medico avansa. 

Ey ta caminda cu tur tension a lanta mirando cu paramediconan a trata e chauffeur pero no por a haci nada mas p’e. Un rato despues a nota presencia di Dr. Texier, fiscal y tambe hefe di e departamento di trafico na sitio. Pa 12:15am dokter Texier a constata morto di e chauffeur femenino di inicial K.C. di binticuater aña di edad. Den entrevista exclusivo cu vocero suplente di KPA, Liliana Rasmijn, a conta cu e personanan aki ta biba na Merca pero no por confirma nacionalidad.

Pa mas of menos 1:05am shersh a busca e defunto y a transport’e pa funeraria. E turista aki ta bira e di 6 morto den trafico pa e aña aki. Estadistica ta mustra cu aña pasa tabatin solamente 5 caso di morto den trafico. 

Di parti di headlines group, e cas editorial di 24ora.com, ta extende palabra di profundo condolencia na famia den e momentonan dificil aki.