Ayera tardi a sali un avion priva cu dos pasahero, di riba 70 aña di edad, bisti cu paña special contra COVID-19 pa Fort Lauderdale. Nan tabatin varios dia pega na Aruba den isolacion y e otro den cuarentena debi cu a contagia cu COVID-19. Awe nan compania di seguro a cubri e vuelo den avion priva pa transporta nan bek pa cas, debi cu ningun aerolinea comercial no kier core e riesgo ey.
Diahuebs merdia pa 12:25pm e avion a sali di Firt Lauderdale rumbo pa Aruba. Aki entretanto autoridadnan a prepara ambos pashent pa nan ta cla pa por aborda asina cu e avion yega y staciona na W-Aviation, pues na e banda di avionnan priva. Pa 3:51pm e avion a baha na Aruba y pa 4:38pm caba el a sali rumbo pa Fort Lauderdale atrobe, den un vuelo di 2 ora y 39 minuut.
A bula cu un avion Learjet 60 di dos motor, cu matricula N613HA, na 38 mil pia di haltura cu un velocidad di 466 miya pa ora durante un vuelo di 2 ora y 39 minuut pa yega e destinacion. E trayecto ta di 1,195 miya di distancia entre Aruba y Fort Lauderdale.
Aunke a realisa e vuelo estilo Air Ambulance, toch ambos pasahero a bula gewoon sinta den stoel normal. Pero tanto e pasaheronan como e tripulacion tabata bisti cu paña special.
Hopi turista tin nan mesun seguro y algun di e seguronan aki ta cubri e tipo di vuelonan special asina pa por yega nan pais bek. Aerolineanan tur dia ta birando mas estricto y no ta permiti pasaheronan cu ta contagia pa subi avion, pa evita cu ta contagia otronan durante e vuelo. Si no tin seguro, e ora mester keda Aruba y warda te ora cu test dos biaha tras di otro y ambos test resulta negativo, pa por subi avion atrobe.
