Diadomingo marduga mas o menos 1:20am a raporta un caso di “hit & run” riba e caminda principal di Palm Beach. Ta trata di dos auto marca KIA pero un di nan a bandona e sitio despues.
Segun e automobilista victima di “Hit & Run” a splica Polisnan cu e tabata para memey caminda sortiando pa por lora, ora cu diripiente un auto a dal su tras. Pa ora e kier a reacciona, el a nota cu e auto a reverse y sigui su caminda manera cu nad’un pasa.
Chauffeur di e auto marca KIA modelo Rio cu number A-3963 no a para man crusa y algun testigo a dicidi di sigui e auto cu a dal den dje. El a pidi nan ayudo pa sigui e auto, pensando cu si e no haci esey, seguro lo no cubri e daño haci patras di su auto. Mientras cu a sali tras di e auto cu a dal den dje, a avisa Polis pa bin duna un man.
Na altura di Local Store a bin topa cu e auto, para den parkeerplaats na e otro banda di caminda. Ta trata aki di un V-Wagen, marca KIA modelo Cerato cu number V-5903 perteneciendo na e compania Royal Caribbean.
Polis a atende cu e chauffeur, un turista Mericano cu obviamente tabata burachi. Den e auto e tabatin un caha yen di boternan di alcohol.
Pa evita cu e ta sigui dal mas auto y pa su mesun siguridad, a detene y hib’e Warda di Polis pa e bay descansa su curpa den un cel y pasa su wayaba. Tambe pa e por pensa bon con e ta cancela e debe prome cu e bandona nos isla.
