E situashon ekonómiko na Kòrsou ta konfrontando hopi reto. Unu di nan sigur ta den e industria di turismo spesialmente e situashon ku diferente hotèl ta pasando aden.
Nos por a sinti e impakto negativo ku e situashon rondó di Inselair a trese ku ne pa ku sektor aki. E falta di mas airlift tambe tin su reperkushonnan pa e sektor aki.
E siere di Hotel Howard Johnson, Plaza Hotel i e renovashon di Marriot Hotel, ku ta tumando hopi tempu na nos pareser, tambe ta pisa den e totalidat. Ademas tin diferente hotel chikí ku tambe ta sufriendo ku bahada di “guests” ku ta influensiá e aspekto finansiero i operashonal.
Komo chèri riba e bolo e desaroyo lamentabel i bergonsoso di kitamentu di koriente na Holiday Beach Hotel, Veneto Casino i Denny’s restaurant resientemente kaminda ku no ménos ku 80 turista i un kantidat di empleado a keda perhudiká ta hasi e situashon mas vulnerabel.
E situashon aki sin mas ta trese ku ne ku nòmber di Kòrsou ta bolbe keda tachá internashonalmente. Ademas e insertidumbre ku e situashon ta trese kuné bou di empleadonan na e establesimentunan ariba menshoná pa ku garantia di nan trabou tambe mester di atenshon.
Tumando na kuenta e implikashonnan preokupante ku e situashonnan ariba menshoná ta trese kuné suskrito ta hasi uso di artikulo 96 di Reglamentu di Orden di Parlamento pa hasi Minister e siguiente preguntanan:
- Minister por informá Parlamento kiko a pone ku e situashon a bira di tal índole ku mester a tuma e medida drástiko i deskonektá e establesimentu nan ariba menshoná for di ret di koriente?
- Gobièrnu tin un maneho deliniá pa loke ta trata kòntròlnan riba e funshonamentu, situashon finansiero i di labor di hotèl nan aki na Kòrsou?
- Si e kontesta ta afirmativo, kon bini e situashon aki a presentá?
- Si e kontesta ta negativo, no ta ora pa gobièrnu krea un plataforma pa
haña un bista real di e situashon di hotèlnan aki na Kòrsou?
- Chata i CTB no tabata na altura di e situashon ku e hotèl ariba menshoná tabata aden?
- Kiko CTB su ròl ta den e situashon aki?
- Kiko ta Chata su ròl den e situashon aki?
- Tin palabrashonnan hasi entre Ministerio di Desaroyo Ekonómiko, ministerio di Desaroyo Sosial, Labor i Bienestar i sindikatonan pa atendé ku e situashon penoso i di inseguridat ku empleadonan di Holiday Beach Hotel, Veneto Casino i Denny’s restaurant ta konfrontando aktualmente?
- Si e kontesta ta afirmativo, minister por informá Parlamento kiko e palabrashonnan ta?
- A tuma kontakto ku e doñonan/ manehadónan riba e situashon grave aki?
- Kiko gobièrnu ta bai hasi pa responsabilisá i kobra e doñonan/ manehadónan aki e sumanan di plaka ku nan debe na e diferente instansianan i pone nan kumpli ku nan obligashonnan?
- Minister por informá Parlamento kua ta e pasonan ku trahadónan den e sektor aki mester tuma ora detektá iregularidat sin ku nan keda menasa of perhudiká?
- Minister por duna Parlamento un bista riba tur e debenan ku tin habri i na kua instansianan esakinan ta?
- Dikon doñonan/manehadónan ta burla di nos leinan i nos hendenan?
- Minister por informá Parlamento kiko gobièrnu ta hasiendo pa garantisá durabilidat di hotèlnan na Kòrsou?
- A pone ministerio di Hustisia na altura di e situashon aki mirando ku tin indikashonnan fuerte di mal maneho?
- Den kua forma hotèlnan grandi i chikí ta keda envolví den promoshon internashonal di Kòrsou komo destinashon turístiko?
Nos a komprendé ku Ministerio di Desaroyo Ekonómiko a intervení pa Aqualectra rekonekta koriente bèk na e establesimentunan perhudiká.
- Minister por afirmá of desmentí esaki?
- Por papia aki di un ‘noodoplossing’?
- Si e kontesta ta afirmativo, kiko ta e palabrashonnan ku tin entre ministerio di Desaroyo Ekonómiko, Ministerio di Finansa, Aqualectra i e establesimentunan ariba menshoná?
- Minister ta na altura si tin mas hotel ku ta konfrontando retonan finansiero?
- Kua maneho gobièrnu ta bai hiba si mas kaso agudo asina presentá?
Laga nos para ketu un ratu i rekonosé e sensibilidat di e situashon aki i evaluá kiko esaki por kondusí na dje.
Si nos ke pa turismo keda un pilar ekonómiko importante tambe mester duna atenshon debido na tur aspekto den e sektor aki sigur si ke salbaguardiá kuponan di trabou.
Nos ta spera ku minister kontesta nos preguntanan pronto mirando ku tin un grupo di trahadó ku ta den un insertidumbre total i asina trese klaridat pa ku nan situashon.
