Turismo ta empuha reserva di divisa NETTO

OLYMPUS DIGITAL CAMERA

Desaroyo monetario Compara cu november 2018, den e luna di december 2018, e cantidad di placa den circulacion a expande cu Afl. 24.3 miyon te na Afl. 4.376,9 miyon. Esaki a resulta door di subida den e reserva di divisa netto (+Afl. 72,0 miyon) y un bahada den e activo domestico netto (-Afl. 47,7 miyon).

E reduccion den e activo domestico netto a wordo causa pa un bahada den credito domestico (-Afl. 48.2 miyon) y un subida den transaccionnan no relata na credito (+Afl. 0,5 miyon). E desaroyo den credito domestico a resulta for di un caida den credito bancario netto na e sector publico (-Afl. 47,1 miyon) y un bahada den credito bancario na e sector priva (-Afl. 1,1 miyon).

Credito bancario na e sector priva a mengua door di menos credito na consumidor (-Afl. 6,4 miyon) y credito na empresa (-Afl. 0,4 miyon), mientras cu hipoteca pa vivienda a subi (+Afl. 5,0 miyon). E caida den credito bancario netto na e sector publico ta debi na un reduccion den debe di gobierno (-Afl. 14,0 miyon) y un subida den depositonan di gobierno (+Afl. 33,1 miyon).

E aumento den reserva di divisa netto di e sector bancario ta debi na compra netto di divisa for di publico (+Afl. 334,8 miyon), primordialmente relaciona cu entrada for di exportacion di turismo. Esaki a wordo parcialmente mitiga pa benta netto di divisa na publico (-Afl. 262,8 miyon), relaciona mas tanto cu importacion di mercancia.

Inflacion E nivel general di prijs, cu ta wordo midi door di e indice di prijs di consumo, a registra un subida di 4,6 porciento den e luna di december 2018, compara cu december 2017. E contribuyentenan principal na e aumento aki tabata e componentenan “Cuminda y Bebida No-Alcoholico”, “Transporte” y “Comunicacion”. Tambe, si exclui e componentenan di cuminda y energia for di e indice di prijs di consumo, inflacion a mustra un aumento di 2,8 porciento compara cu december 2017. Pa loke ta trata e promedio anual di e tasa di inflacion, esaki a registra 3,6 porciento na december 2018, compara cu 3,2 porciento na november 2018.

Entrada di Gobierno Na december 2018, entrada di gobierno a suma Afl. 144,1 miyon, cual ta Afl. 13,8 miyon menos compara cu e mesun luna di e aña anterior. Esaki a resulta for di menos entrada no relata na impuesto (-Afl. 13,9 miyon), mientras entrada di impuesto a keda igual. E ultimo menciona a resulta door di principalmente mas impuesto riba benta di negoshi (+Afl. 9,3 miyon; introduccion di B.A.V.P compara cu e mesun luna den 2017), cual a wordo principalmente mitiga pa menos entrada for di impuesto riba propiedad (-Afl. 3,9 miyon) y e asina yama “transfer tax” (-Afl. 3,5 miyon).

J.E. Irausquin Boulevard 8 P.O. Box 18 Oranjestad Aruba Tel. nr.: (297) 525-2100 Fax nr.: (297) 525-2101 E-mail: [email protected] Website: www.cbaruba.org

Turismo Tuma nota cu e cifranan di turismo no tabata disponibel na momento di publicacion di e relato aki.

Pa mas informacion of un analysis mas detaya, bishita nos website (www.cbaruba.org) of tuma contacto cu e Departamento di Estadistica di Banco Central di Aruba, tel. +297 5252100, e-mail [email protected]

Comments

comments