Turismo den Karibe su prestashon i su opstákulonan… CHATA –MCB Breakfast Meeting

104

Riba djabièrnè 19 di òktober, CHATA a organisá su ‘Breakfast Meeting’ pa aña 2018 na Omundo Restorant kual ta un miembro

di CHATA. E ‘Breakfast Meeting’ a enserá presentashonnan di Sra. Martha Valdivia, Direktor di Desaroyo di Membresia na CHTA, Sra. Stacy Cox, Presidente i CEO di Asosiashon di Hotèl i Turismo di Islanan Turks i Caicos, Sra. Tisa LaSorte, Presidente i CEO di Asosiashon di Hotèl i Turismo di Aruba. Komo miembro di ‘Caribbean Society of Hotel Assocation Executives (CHSAE), kada oradó a proveé nan interpretashon tokante e prestashon i opstákulonan di Turismo den Karibe.

Pa por sigurá un desaroyo optimalisá di e sektor di Turismo nos mester por elaborá i evaluá kon otro isla ta manehá e industria. Komo region Karibense nos mester mira nos mes komo un famia grandi ku mester yuda otro pa asina desaroyá turismo pa e region. Espesialmente mirando e echo ku e industria ta un di e pila nan ekonómiko mas grandi pa gran mayoria di isla Karibense. Pa e motibu aki, CHATA a invitá tres direktor di asosiashon, kende tur ta miembro di ‘Caribbean Society of Hotel Association Executives’ (CSHAE). Sra. Martha Valdivia, Sra. Stacy Cox i Sra. Tisa LaSorte tur a proveé nan pensamentu riba e Turismo di Karibe i kon nan asosiashon ta manehando e industria pa nan isla.
Segun, Sra. Stacy Cox, Presidente i CEO di Asosiashon di Hotèl i Turismo di islanan Turks & Caicos, krea demanda pa bo isla mester ta di sumo importansia. Pa e Turismo di Karibe por destaká e ta importante pa kada isla krea demanda pa medio di invershon den e merkado nan ku ta mustrando interes pa e destinashon.
Sra. Martha Valdivia, Direkto di Desaroyo di Membresia na Asosiashon di Hotèl i Turismo di Karibe, a informá tur presente tokante e organisashon su meta primordial i e aktividatnan di e asosiashon.
Komo e asosiashon mayor ku ta representá 32 destinashon Karibense, CHTA ta responsabel pa sigurá ku e Turismo di Karibe desaroyá riba un eskala makro.
Sr. Miles Mercera, Presidente i CEO di CHATA, sinta huntu ku Sra. Tisa LaSorte, Presidente i CEO di Asosiashon di Hotèl i Turismo di Aruba, den un seshon di entrevista. Segun Sra. LaSorte, Turismo di Aruba ta mirando e benefisionan di kolaborashonnan fuerte entre e sektor públiko i privá kual ta un indikashon ku mester kontinuá riba e ruta aki. Komo konseho pa Kòrsou, Sra. LaSorte a enfoká riba e kreashon di demanda pa e destinashon i alabes a menshoná ku e generashon di aña 2000 ta e merkado perfekto mirando e produktonan ku Kòrsou ta ofresé.
Segun Sr. Miles Mercera; “Awe nos a tuma e tempu pa ekspandé nos konosementu tokante Turismo i alabes engrandesé nos pashon pa turismo aún mas tantu. Pa Turismo di Karibe nos, komo region, mester uni nos mes i bira un famia grandi di Karibe. Un opstakulo komun ku Turismo di Karibe ta enfrentá ta e echo pa haña rekurso finansiero ku ta optimalisá. Sinembargo, esaki no mester stroba nos. Al kontrario, e mester enkurashá nos pa manehá Turismo na un manera ‘out of the box’ kaminda invershon, fleksibilidat i pensa kreativo ta hunga un ròl vital. Pa medio di dirigí tur nos esfuerso tras di un meta komun kual ta pa elevá e Turismo di Karibe nos por garantisá un industria lukrativo. Pa e motibu aki komo region nos ta entusiasmá pa sigui reforsá nos lasonan Karibense i alabes interkambiá informashon ku otro.”

Dare to Think Differently!
CHATA lo konitnuá ku su esfuerso pa involukrá tur organisashon ku ta relevante pa e desaroyo di nos industria di turismo. Tambe lo sigui organisá mas konferensia similar pa asina eksplorá idea nan nobo i úniko ku por kontribuí na e kresementu di nos Turismo.
CHATA ta mira bèk riba un konferensia eksitoso i informativo. Tambe CHATA ke ekstendé su gratitut na su miembro i sosio Maduro & Curiel’s Bank pa por a patrosiná e ‘Breakfast Meeting’ na Restorant Omundo. Trahando huntu nos ta move pa dilanti i alkansá un Turismo vibrante i
Duradero.
Pa mas informashon, por fabor bishita nos website www.chata.org i sigui nos riba Facebook www.facebook.com/CHATACuracao