Desde 10:00pm tur 4 Warda di Polis, pues tanto esun na Oranjestad, San Nicolas, Santa Cruz y Noord a bay plat ora cu tur Polis a sali pafo den un accion di dos ora. Joselito Dirksz di Sindicato SPA a bisa cu esaki ta danki na e arogancia di Gina Maduro y Sindicato ABV, cu ta yega na e Gobierno actual, cu a logra regla pa nan no entrega ni salario ni vakantie-uitkering.
Polisnan ta considera nan mes como frontliners den e periodo aki di Covid-19. Nan ta traha hopi biaha riba caya, ta atende hende cu kisas por ya contagia y riba dje mester a traha extra pa mitiga aumento di criminalidad debi na retonan economico cu a asota nos isla ora cu turismo a yega 0.
Gobierno a papia di solidaridad y cu tur hende mester entrega. A start na empleadonan publico, Parlamentarionan y Ministernan. A sigui pa companianan estatal, pero Hospital, aunke ta depende 100% di AZV cu ta traha cu placa di belasting di pueblo, a haya “luz berde” pa no entrega. Awor ta mustra cu ABV si a logra pa nan miembronan mientras cu tur otro sindicato, incluyendo SPA, a faya den negocia un bon “deal” pa nan miembronan. Como contesta Polisnan a sali mesora awe nochi mes pa demostra nan malcontento.
Gobierno, por medio di Minister Dangui Oduber a subi Facebook mesora pa informa cu Hospital tambe ta solidario y cu nan lo entrega. Esey pa contene emocion di tur otro sindicato y departamentonan di Gobierno cu no a aprecia e trato preferencial cu Gobierno y AZV lo ta dunando Hospital. Ta sinti cu ta “nan so” ta frontliners den e pandemia aki. Minister no a menciona kico e trahadonan di Hospital lo entrega, pasobra awe nan sindicato a gaba bou fi nan miembronan cu nan si lo cobra dos salario e luna aki, tanto nan salario normal sin kita nada y nan vakantie-uitkering cu ta un luna extra (13de maand) di salario.
Na Warda di Polis di Playa nan a sali prome, pa demostra nan malcontento pa e situacion. Gilberto Lugo di SPA a sali hiba palabra y a anuncia cu pa dos ora largo, entre 10:00pm y 12:00am, lo no atende ningun asistencia comun.
Na Warda di San Nicolas tambe Polisnan a sali mesora y a pone trabou abou. Alexander Solarte-Tovar di SPA a bisa di ta para 100% tras di nan sindicato y nan Presidente recien eligi. E forma con Gobierno ta trata un grupo y previlegia otro, no ta promove solidariamo sino mas bien ta causa division y ta aporta na polarisacion entre empleadonan publico.
Na Warda di Polis di Shaba na Noord tabata e mesun Presidente di SPA, Joselito Dirksz, a hiba palabra den un conferencia di prensa pafo di e edificio. A menciona cu Polisnan lo sigui atende sucesonan serio so, manera atraco of asesinato. Tambe el a cuminsa anuncia cu tur dia lo intensiva e accionnan tanten cu Gobierno no recapacita y trata tur empleado mesun bon y subraya kico ta solidarismo bou di su empleadonan. Sea ta traha directamente bou Gobierno of indirectamente, manera ta e caso di Hospital.
Na Santa Cruz tabatin solamente un “ploeg” di Polis trahando y tur a sali pafo. Net pa 11:00pm un otro ploeg mester subi “nachtdienst” pa cual a bin mas trempan pa para solidario cu nan coleganan bahando “avonddienst”. Rodney Solognier di SPA a indica cu Polisnan lo asumi nan responsabilidad na momento cu ta rekeri esey di nan, pero lo no tin patruyanan normal mas te cu marduga. SPA ta solidario cu e lucha, sea tur hende ta cobra “vakantie uitkering” of ningun ta cobr’e, pero e cuenta di un si y otro no, ta motibo pa escalacion di e accionnan sindical.
For di Sindicato SINBA di Cuerpo di Bombero nos a compronde cu lo reuni mañan den seno di nan directiva pa fiha nan posicion. Nan a wordo menasa, a tira nan cu klinker, a kibra nan trucknan durante pandemia y awo diripiente nan no ta categorisa Bomberonan mas como “first responders”. Sindicato SIMAR di docentenan tambe a manda informa riba Facebook di lo reuni internamente pa fiha un posicion nobo, awor cu Gobierno ta traha su trahadonan di forma desigual.
Mientrastanto mando policial a activa Mobiele Eenheid di Polis pa subi caya mesora y asina contene cualkier situacion cu por presenta. Altocomisario interino Vanessa Tjon-Kock a pidi Gobierno pa aclaria e situacion aki pa evita escalacion y caba cu e intrankilidad cu ta reinando awor aki entre e Polisnan.
E Altocomisario di Polis a subraya cu Aruba ta pasando den momentonan di reto pa cu nos orden publico y criminalidad engeneral. E comportacion riba caya di un grupo den comunidad tambe ta laga di desea. Ta pesey awor no ta momento pa e tipo di discusionnan asina, unda Polis ta demotiva y no ta dispuesto pa sirbi comunidad manera custumber.
