Durante un conferencia di prensa dialuna mainta Sociale Verzekeringsbank (SAVb) a informa di kico ta bay pasa den e situacion nobo awo cu a habri economia local bek y pronto frontera tambe lo habri. Pero tambe e subsidio di salario pa luna di juni cu tin un condición nobo.
Tur instancianan envolví, cuminsando cu Departamento di Calamidad, ta prepara pa e siguiente fase cu ora cu habri frontera. E plan ta cu si e virus drenta drenta, mantene e cifranan mas abou cu ta posibel. “Si nos no traha hunto, nos no ta logra esaki,” dr. Myron Genser di SVb a splica. E luna aki un team di SVb lo subi caya pa bishita diferente luga (oficina y negoshinan) pa monitor si nan ta manteniendo nan mes na e protocolnan.
Ir. Edwin Jacobs, director di SVb, di su banda a bisa cu ta masha importante pa tur hende cuminsa custumbra, aunke e casonan ta minimo, na e sistema nobo. Esaki pasobra si laga tur cos un banda, di distanciamento social y labamento di man, ora e di dos ola yega ta laat pa bay atrobe na e reglanan nobo. Mester simplemente implementa e normal nobo den nos bida diario awo. “Ban mantene bou tur circunstancian e medidanan nobo cu Gobierno a bini cu nan den Protocol. Si nos bay bini cu ne te ora un di dos ola cuminsa, rumannan ta un desaster nos lo tin,” Jacobs a bisa.
E bishitanan den luna di juni ta bay ta na Departamentonan di Gobierno pa mira si nan ta cumpli cu e protocolnan cu a pone pa henter Aruba.
Subsidio di Salario
Director di SVb a enfatisa cu e programa aki ta pa mantene cuponan di trabou, di tur esnan cu ta registra na SVb pa dia 15 di maart, te ora cu trece economia completamente bek riba pia. Pero e ta un programa cu tur luna Gobierno mester haci un prestamo pa esaki na Hulanda.
E ta un aporte pa un parti di e salario di e empleadonan y e gasto cu e dunado di trabou tin ora cu e tin personanan den servicio.
E subsidio aki ta depende di e perdida di venta cu e compañía aki premira cu e ta bay tin den luna di mei, en comparacion cu e mesun luna di aña. E trahado tin derecho pa haya informacion di kico SVb a haya pa su salario pa evita cu e hendenan aki ta tuma contacto directo cu SVb. No por kita e empleado for di trabou mientras ta haya subsidio di salario.
Un analisis haci door di SVb ta mustra cu mas o menos 3200 empresa a wordo categoriza como empresanan vulnerabel y cu tin hopi chens di sufri un perdida di mas cu 25% y 1647 a haci peticion pa subsidio di salario y 1617 a haya e subsidio aki. DI e otro 30 empresanan, 16 no por a duna ainda un cuenta di banco pa manda e suma y e restonan a manda e placa dos biaha pero banco ta rechasa e transferencia. A pidi nan tuma contacto cu nan banco. Un total di 27.207 trahado a bin na remarca pa haya subsidio. Tabatin 4 compania a debolbe e subsidio y 9 compania nan obheccion a wordo trata. Esaki ta nifica cu nan a haya chens un biaha mas pa inscribi y seis a haci peticion pa e subsidio, 900 trahado no tabata den servicio mas prome cu 15 di maart. E suma total paga na subsidio di salario tabata 44.9 miyon florin.
Juni
Pa loke ta luna di juni, Hulanda a pone un condicion extra. Cada trahado cu ricibi subsidio di salario mester bay di acuerdo cu un reduccion di 20 porciento riba salario. Cada doño di trabou ta haya un lista di trahado, kendenan mester firma cu nan ta bay di acuerdo cu reduccion di 20 porciento di salario. Si tin un trahado cu no ta di acuerdo, e compañía ey no ta ricibi subsidio di salario.
E compañía tin 10 dia pa cumpli cu e exigencia aki pa loke ta subsidio di salario pa luna di juni.
