Realmente mester tin poco diferencia entre un ehecutivo comercial y un ehecutivo politico (Minister). Ambos mester busca proyectonan cu ta factibel pa realisa y cu tin un balor agrega. Sea cu e mester haci un ganashi of e mester beneficia un sector di e comunidad, por ehempel den casonan social. Hecho ta cu tur plan mester ta pagabel y sostenibel.
Minister Chris Romero cu hopi entusiasmo kier promove San Nicolas y vecindario. Kedando den su cartera e ta buscando un forma pa realisa un servicio di fast-ferry entre nos islanan ABC y cu e punto di contacto di e ferry ta San Nicolas. Un bunita proyecto si e por keda concretisa.
Galopiando cu e idea di e fast-ferry, e Minister a crea mas ilusion, anunciando e plan pa San Nicolas bira ademas un haf/waf adicional pa bapornan di carga y bapornan crucero. Supuestamente Royal Caribbean lo ta sostene esaki. E beneficio di pone tambe un otro waf cu ta ricibi carga, no a carga ningun padrino, pero e Minister tabata hopi positivo cu su realisacion por ta net na e proximo lorada.
Pa analisa e idea di e Minister y si e por ta algo serio tabata mester reuni tur e piezanan pa mira ki balor e por tin. Lo ta condenabel si esaki ta djis un blaas cu no por wanta ni e straalnan di nos solo fuerte. Crea speransa falso pa consumo local y hunga cu sentimento di hende ta casi sinonimo di otro. Door di abstene di duna un cifra di ki inversion nos ta papia aki, e Minister ta crea e impresion cu ta piezanan di Lego e tin su dilanti. Su propio APA y ASTEC por bisa cuanto e waf di Barcadera a costa. Ta conoci cu esey ta cuantioso. E tabata riba plan di hopi Gobierno, pero a keda na plan door di ta un inversion asina grandi y ta te ora cu a bin un Gobierno cu curashi pa realis’e, Aruba por a separa e movemento di carga for di esun di turista.
Hasta si asumi cu tin financiamento y un estudio di factibilidad, e pregunta ta keda ki ta e sentido comercial pa Aruba di tin un di dos waf di crucero y un di dos waf di carga. Ki lo ta e balor agrega? Dos biaha mas “overhead” pa e mesun volumen? Sin toca e punto cu si ASTEC tin un monopolio of no, ki e balor agrega lo ta pa Aruba? Nos lo haya mas crucero ? Nos lo haya mas container, ya cu nos pueblo di biaha ta bay gasta mas ? E mesun bolo, pero cu slice mas fini!
E mesun hecho cu ningun inversionista no ta desea di construi un hotel si no ta na e beachnan na Playa ta aplica na e companianan di bapornan crucero di ta asina contento cu e desaroyo den y rond Oranjestad, cu Aruba a converti su mes den un destinacion cu pasaheronan ta demanda pa Aruba ta riba e schedule. Loke Gobierno mester haci ta di converti San Nicolas y vecindario den un “must see attraction”.
Pa esey no tin un “quick fix”, ni un resultado pa gana reeleccion den 4 aña. Un plan di hopi aña, pero cu mester cuminsa un caminda. Sin analisa si ta e webo of e galiña a bin prome, e prome hotel na San Nicolas lo ta e prome piedra den e bon direccion, semper y cuando e bay man den man cu un desaroyo total. Un planificacion cu lo conserva San Nicolas su propio caracter.
Esaki lo ta un tarea mucho grandi pa Minister Romero? Si realisa cu e tin un aña sinta como Minister y ainda e no por tuma un decision simpel bao di ki norma AruPark mester opera, e duda ta bira hopi grandi cu si e Minister, lo por ataca un proyecto grandi y no busca cua ta e siguiente blaas di helium cu e lo laga slip for di su dedenan. AruPark tin un infrastructura cu no falta nada, fuera di e curashi di e top pa tuma e decision corecto con e compania por beneficia e comerciantenan den Caya Grandi y vecindario.
