Ya nos ta den fin di aña y pronto lo bay tin e actividad tan spera cual ta Dande. Pa e aña aki e lo ta un actividad hopi grandi, principalmente pa e bario di Brazil, ya cu ta celebrando 50 aña cu nan ta organisa e festival aki, cu lo tuma luga dia 27 di december.
Segun Chico Harms di e comision di festival di Dande di Centro di Bario Brazil, ta celebr’e for di Pos Chikito te p’arti p’ariba na Sero Blanco. Tur esnan cu antes tabata na Brazil pa brinda cu dande, tambe ta invita pa e actividad aki. E actividad ta bon hinca den otro, cuminsando pa 6’or di atardi y lo caba te den oranan laat.
E actividad
Tito Tromp, kende tambe ta forma parti di e comision, a comenta cu e festival aki ta hopi grandi. Pa prome biaha Dande a wordo organisa bao di scol Cristo Rey na 1969 y awor aki na 2019, ta celebrando 50 aña.
Pa esaki kier a haci un reconocemento special na algun pilar, unda cu 42 persona lo ricibi reconocimento den un forma of otro, den cuadro di sea cantante, grupo of persona cu a yuda den organisa e organisacion di Dande p’ariba di brug.
Ta stress p’ariba di brug, ya cu ta compronde bon, a cuminsa cun’e prome cu e otro festival. Ta pa e motibo ey ta celebrando 5 lustro.
Tin un total di 18 grupo, cual ta un record pa Brazil y pa e motibo ey, ta cuminsa ya pa 6’or di atardi, unda cu ta reconoce e pilarnan. E bunita lo bay ta cu si ta papia di aña 69, ta bay tin fecha di nacemento di siglo 19. Ta hendenan cu a nace na 1890 cu den nan epoca a canta Dande cu no ta cu nos mas, pero un familiar lo ricibi e reconocemento pa nan.
Manera ya indica, tin 18 grupo, cantidad exacto di cantante no ta conoci ainda, mirando cu cada grupo tin un formulario cu nan mester yena y esey tambe ta purba pa no caba laat.
Tin cierto condicion pa e gruponan cu nan no por tin mas cu cuater cantante pa grupo. Si tin 18 grupo e ora no lo caba na tempo y pa esnan cu conoce e festival di dande, na dado momento e ta bira monotono. Ta un dande tras di otro y specialmente si tin mucho tardansa.
Tin time limit tambe pa tanto warm-up y tambe pa e dande mes.
Ta purba di haci’e mas lihe posibel na un ora decente tur hende por ta na nan cas. Ta pensa pa caba pa 12’or di anochi.
Documental
Tromp a agrega cu kier bay documenta e dande di p’ariba di brug y pa otro aña lo bay busca dato. Ta bay traha un programa y un documental di dande tanto skirbi como filma, pa por trece esaki pa e futuro generacionnan pa nan sa con dande a cuminsa y con el a desaroya durante e añanan. Esey ta un proyecto cu tin pa otro aña y na su debido tempo lo informa pueblo riba esaki.
Fabian Ras tin un dobel funcion den e evento aki. E ta presidente di Union Tipico Arubiano, cual ta representa por lo menos 20 tipico y ta miembro tambe di Fundacion Chico Harms, cu ta encarga cu e celebracion di 50 aña di dande den pueblo di Brazil.
El a probecha e oportunidad pa gradici tur grupo tipico, tur centro di bario, club, boluntarionan, directiva completo di Union Tipico Arubiano pa e aña cu a caba di clausura pa e fiesta tipico den bario, cual tabata uno hopi fructifero musicalmente papia.
Ainda tin mas trabao pa haci. Ta bezig riba e tereno y cu otro aña lo dal stapnan hopi mas grandi cu por sigui organisa e fiestanan tipico, pa duna e tipiconan un chens pa nan toca y sali dilanti, mustrando kico nan por riba tereno musical.
Festival di Dande
Manera palabra den nan reunion, ta cuminsa cu e programa cu Sodo y Cuero, tin Tipico Yara, Tipico Camari, Tradicion Musical, Lucero del Alma, Inspiracion, Tipico Palisia, Un Brindis, Tipico Famia Uni, Alma Folklorico, Brisa Tropical, Stimami, Zonido di Antaño, Tipico Ayo, Tipico Pegasaya, Tipico Poco Loco y Tipico Perla.
Pa e programa cana mas lihe pa por caba na un ora decente, no den oranan laat di marduga, a bin cu cierto reglanan pa e festival caminda cu cada grupo ta haya un cancion pa warm-up. Esey no mag di ta mas largo cu dos minuut.
E dandenan no por ta mas largo tampoco cu 3 minuut y mey. P’esey ta bay tin un control via luz, cu ta avisa ki ora e tres minuut y mey nan ey ta yegando.
Ta busca manera pa bay mas lihe posibel cu e festival, segun Ras. Den e caso aki ta cuminsa na ora y kier sigui rapido cu e setup di cada grupo. Tin regla con pa subi y baha for di escenario.
Diahuebs awo tin un reunion cu e gruponan. Eynan ta bay haya sa kende tur ta e cantantenan di cada grupo. Esey lo tuma luga pa 7’or y mey di anochi na Centro di Bario Brazil, pa asina nan trece nan formulario cu tur nan cantantenan di dande.
Entrada
Entrada ta na balor di 5 florin. Mucha bao di 12 aña ta gratis. Ta bay tin un bar y cushina bon surti.
