Tur 10 Venezolano cu a yega Aruba ilegalmente a pidi asilo

Diadomingo anochi lat a drenta informacion di un boto cu a yega Santana di Cacho pa baha Venezolanonan den forma ilegal riba nos isla. Warda Costa y Polis a logra detene tur na e sitio, mientras cu mainta a haya bala cayente na e mesun sitio unda a descubri e ilegalnan. Ayera mes tur 10 ilegal a haci peticion di asilo.

ADV

Por lo menos dos di e ilegalnan deteni a bin Aruba recientemente caba y tabata deporta. Esey ta haci nan chens pa consideracion di un status di “refugiado” masha dificil. Mirando e circustancia den cual a descubri e ilegalnan aki, a opta pa no laga nan den libertad temporal mientras ta atendiendo nan peticion pa asilo.

Manera ta conoci, Gobierno tin un comision awor cu ta procesa e peticionnan di asilo den un forma acelera, pa evita cu esunnan cu ta haci dicho peticion mester warda simannan prome cu haya un contesta. Awendia den algun ora despues di nan detencion, ya caba e comision ta scucha nan y ta evalua nan declaracion y peticion pa asilo. Ta nengando mayoria y den Corte ainda e comision a gana tur caso di protesta contra nan decision.

Den e caso specifico aki, di acuerdo cu nos fuentenan den Guarda nos Costa, e grupo aki ta confrontando mas acusacion cu djis simplemente di a purba drenta nos isla sin un permiso legal y sin pasa via control na frontera. Mirando cu ta acusa, por ehempel, e capitan di traficacion di hende, tin algun di e ilegalnan cu ta deporta caba den un pasado recien cu prohibicion pa drenta nos isla pa un periodo defini y riba dje a haya bala cayente na mes sitio unda nan a subi tera banda di Baby Beach, cu awor e trayecto administrativo ta cana paralelo banda di e trayecto penal den man di Polis.

Mester bisa si cu e cantidad di peticionnan pa asilo na Aruba a baha drasticamente, desde cu Trudy Hassell a cambia e maneha na Migracion na Aeropuerto, cu ta manda tur Venezolano bek cu no yega directamente for di Venezuela, y cu pidi pa asilo. Den ley ta menciona cu como “refugiado” Bo mester haci dicho peticion na e prome pais unda bo yega. Pues no por ya asina cu ta sali di Venezuela pasa Colombia of Panama y ta te ora yega Aruba ta pidi pa asilo. Lo mester a haci e peticion for di momento cu a yega Colombia of Panama caba.

Banda di esey, e realidad cu no tin vuelo directo mas pa Venezuela ta haci cu casi ningun peticion ta drentando mas di e grupo ey. Locual si ta drentando keto bay ta di Venezolanonan cu topa riba caya trahando ilegal of djis riba caya sin cu por demostra un permiso valido di estadia of di trabou. Asina nan yega Guarda nos Costa nan ta “purba nan suerte” pidiendo status di asilo.

Ta premira cu den e siman aki ainda e Venezolanonan cu a yega Aruba diadomingo anochi lo por haya un contesta riba nan peticion pa keda Aruba permanentemente bou status di refugiado debi na instabilidad politico, social y cu scarsedad di opcionnan pa ayudo humanitario y medico na nan pais Venezuela.

Comments

comments