E stof di Sahara ta algo cu ta sinti normalmente dos pa tres bes pa aña. Y e temporada aki ta algo normal cu e ta plama riba Caribe, incluso Aruba.
Riba mapanan satelital por mira un mancha grandisimo pa algun dia caba cu ta tapa parti di Atlantico, Caribe y Latino America.
E ta un nubia maron, cu ta capta riba imagennan for di Africa te cu Caribe. Esaki ta e señal cu otro capa di stof di Sahara – un masa di aire seco y yen di polvo di e desierto Nort Africano – ta move pa continente Americano.
Esaki ta algo normal den e temporada aki, segun Dave Barkmeyer, director interino di Departamento Meteorologico Aruba, a bisa. Semper na cuminsa di aña ta haya e fenomeno aki cu ta drenta for di Africa cu ta invadi e parti Zuid di Europa, ta yega te banda di Inglatera, y naturalmente ta extende pa Caribe y costa oost di Merca.
Por a mira e concentracionnan leve di e stof di Sahara den Caribe. Pa e proximo dianan e concentracionnan ta un poco mas visibel. Personanan cu problema respiratorio of alergia mester tuma medidanan necesario pa evita problema di salud.
E stof di Sahara no ta trece cos malo so, segun Barkmeyer. Ta conoci cu e stof aki ta yuda den agricultura, e ta promove pa e matanan crece mas lihe, door di cierto materialnan cu e tin den dje. Ta custumbra pa sinti e stof di Sahara sigur dos pa tres biaha pa aña, y den e parti memey di aña e ta hopi mas pisa.
Esaki ta bini husto na momento cu tin un biento basta fuerte. Aunke cu den e dos dianan tras di lomba e velocidad di biento a baha, por spera cu entrante awe e biento di Cuaresma lo subi atrobe. Pa cualkier advertencia of cambio di tempo, ciudadanonan por subi riba www.meteo.aw y ta haya mas informacion.
