E kompanía di aviashon TUI na Curaçao, Aruba i Boneiru ta inisiá e siman aki un akuerdo importante di kolaborashon ku Guardian Group Fatum. E asegurado aki ta bai perkurá pa seguro di biahe i di anulashon pa e biaheronan di TUI di nos islanan.

Ámbos partido ta hopi entusiasmá ku e kolaborashon aki ku lo sòru pa biaheronan ku kumpra nan pasashi na e agensia di biahe TUI, lo risibí aun mihó servisio. Un seguro di biahe i di anulashon ta sumamente importante na momentu di kumpra un pasashi pa un biahe sin preokupashon.

Sebastiaan de Vries, Area Manager di TUI ta hopi kontentu ku e kolaborashon ku e partner lokal, “Ku esaki nos ta brinda mas komodidat na nos klientenan i biaheronan i nos por ofresé un pakete di servisio mas kompletu. Nos meta ta pa amplia nos servisionan mas tantu, i nos ta orguyoso di por anunsiá e kolaborashon ku Guardian Group Fatum”.

Diego Fränkel, Presidente i Gerente Ehekutivo di Guardian Group Dutch Caribbean tambe ta kontentu ku e kolaborashon nobo aki. “Nos ta ofresé diferente pakete i módulonan di seguro di biahe, asina tin pa kada biahero un pakete ku ta kuadra ku nan. Ta tremendo ku tantu e seguro komo e biahe por ta kompletamente adaptá na kada kliente. Nos ta orguyoso ku e kolaborashon ku un aerolínea i kompania biahe di hopi konfiansa manera TUI”, di akuerdo ku señor Fränkel.

Ya kaba nos agente di benta Desiree Henriquez a hasi nos promé kliente kontentu ku un seguro di biahe riba e dia ku a introdusí e kolaborashon.

Comments

comments