E presidente di Merca, Donald Trump, a bisa diadomingo cu pa manda militarnan pa Venezuela, ta un opcion y cu el a rechasa un reunion pidi pa e mandatario di Venezuela, Nicolas Maduro.
“Esaki sigur ta riba…. Ta un opcion,” Trump a bisa den un entrevista transmiti diadomingo den e programa “Face the Nation” di CBS.
“Wel, e (Maduro) a pidi pa un reunion y mi a rechasa pasobra nos ta hopi avansa den e proceso.”
“(Venezuela) tabata – Trump a opina – e pais mas rico di tur den e parti eynan di mundo, cu ta un parti di mundo hopi importante. Y awo, bo ta mira pobresa, bo ta mira angustia y bo ta mira crimen y tur e cosnan cu ta sosode. E ora ey, mi ta kere cu e proceso aki ta desaroyando. Protestanan grandi, hopi hopi grandi.”
E siman aki, Maduro a bisa e agencia di noticia Ruso, RIA Novosti, cu e tabata dispuesto pa dialoga cu Trump den “priva, den publico, na Merca, na Venezuela of unda cu e kier, cu un agenda habri, tur e temanan” cu Cas Blanco kier aborda.
Maduro, den ocasionnan anterior, a pidi dialogo na Trump, kende a mustra di ta habri pa topa cu e mandatario Venezolano durante e ultimo Asamblea General di Nacionnan Uni, cu a tuma luga na September na New York, aunke finalmente no a tuma luga ningun encuentro.
E tension entre Merca y Venezuela a aumenta desde cu dia 10 di Januari, Maduro a bolbe asumi e Presidencia como fruto di eleccionnan cuestiona di parti di e comunidad internacional.
Di e forma aki, Trump a reitera diadomingo cu e opcion militar ta sigui riba mesa y sin menciona pa su nomber, el a alaba e hefe di Parlamento di Venezuela, Juan Guaido, kende dia 23 di Januari, a autoproclama como presidente interino di e pais, ora el a considera e tma di posesion di Maduro como ilegitimo.
“Bo tin un cabayero hoben y energetico y den e mesun grupo aki, bo tin hende hopi comprometi, si bo kier papia di democracia, esey ta democracia den accion,” Trump a considera.
Guaido a nombra varios embahador, entre nan su representante na Merca, Carlos Vecchio y Julio Borgues, designa como representante ante e Grupo de Lima, cu ta agrupa varios pais di e continente Americano.
Vecchio, Borges y otro representantenan di Guaido, a reuni e siman aki na Washington cu e vicepresidente di Merca, Mike Pence y a combersa riba e despliege di ayudo humanitario.
E Gobierno di Trump tabata e prome den reconoce Guaido como presidente interino di Venezuela y como respuesta, Maduro a corta relacionnan diplomatico cu Washington.
