Dialuna mainta e caso di e dos muhenan Venezolano, envolvi den caso patruya 37, a keda trata den Corte pa hues comisario evalua e forma con nan detencion a tuma luga. A resulta cu e directora di Warda Nos Costa a comete un blunder y e mes ta admiti esey den un declaracion manda pa prensa. Den e declaracion Hassell ta cuminsa pa splica prome cu e dos muhenan den oranan di atardi a keda deporta di Aruba pa despues splica e decision di hues comisario cu e detencion a bay di un forma ilegal.
E declaracion ta bisa lo siguiente: “Directora di Warda Nos Costa Sra. Trudy Hassell dialuna atardi a informa cu den oranan di merdia e dos damanan conoci pa patruya 37, a wordo hiba conforme leynan, dilanti hues comisario pa toets nan detencion, si e tabata corecto si of no y ta mara tambe na deportacion.
Diasabra ultimo Warda Nos Costa a bay aeropuerto y ta detene e personanan aki momento cu nan tabata cla pa sali di Aruba. Mesora a haci e detencion cu un meta, pa garantisa cu e personanan aki por lo pronto no por regresa Aruba. Nan a keda deteni na aeropuerto y treci Warda Nos Costa y mesora a traha nan ordo di detencion y expulsion.
Dialuna merdia hues comisario a tuma su decision unda el a bisa cu mirando cu a detene e personanan na aeropuerto, na unda nan tabata bayendo afo, no Venezuela unda nan mester bay pero tabata bay otro pais, hues ta haya cu no mester a detene nan. Esey a haci cu e bewaringstelling ta onrechtmatig.
Pero si e ordo pa expulsion ta keda vigente y esey por wordo ehecuta. Pa Sra. Hassell esey ta e meta principal di e detencion di Warda Nos Costa pa cu e damanan aki mirando e daño cu nan a causa na pais Aruba. Esaki a trece cun’e, cu nan peticion pa asilo a wordo nenga y e momento ey nan a cay den e pool di personanan ilegal na Aruba y nan mester a sali pa nan pais di origen. Aworaki e personanan aki lo wordo expulsa y por lo pronto no por regresa Aruba. Pa Warda Nos Costa nan meta ta cumpli.”
