Diamars mainta, den e bunita Parke Nacional Arikok, trinticinco medio di comunicacion a bini hunto pa un desayuno unda a celebra y refleha den conexion cu Dia di Prensa. Esaki tabata un iniciativa di Aruba Airport.
Marylin Feliciana, Marketing & Communications Manager ta conta nos cu esaki tabata un oportunidad pa pasa tempo un rato cu miembronan di prensa local, kende ta pasa henter aña ta traha hunto cu nan caba, “y asina gradici nan p’e trabao cu nan ta haci pa nos pa mantene nos comunidad informa”, segun Feliciana.
Den tres pa cuater aña lo finalisa “gateway” nobo den su totalidad
Un di e cosnan cu sigur prensa ta yudando den comparti informacion riba dje ta e desaroyonan grandi cu tin den nos aeropuerto. Jurgen Benscho, Chief Operations Officer ta informa cu manera conoci, aeropuerto a habri e prome fase di e Gateway nobo na april. “Nos ta hopi contento con esey ta desaroyando”, segun Benscho. E ta sigui bisa cu esey ta un parti chikito di e proyecto den su totalidad. E enfoke aworaki ta con pa haci e proyecto mas cortico pa por habri esaki den su totalidad den e proximo añanan nos dilanti, mas o menos tres pa cuater aña unda lo por tin tur cos cla.
E cifranan pa loke ta bishitante na nos aeropuerto ta creciendo hopi y recientemente a yega na 3.9 miyon, anto e proyecto nobo ta bay te 4 pa 4.2 miyon. Naturalmente esey no lo pasa di un dia pa otro. “Aeropuerto ta un infrastructura importante pa por garantisa cu e isla den su totalidad por trata tur turista cu ta drenta y sali.”
Awor akinan e ta restringi pasobra nos infrastructura no por carga hopi mas pasahero manera cu e ta. P’esey e proyecto Gateway ta uno importante pa garantisa un futuro sostenibel, y un producto sigur p’e usuarionan. Awor akinan riba un diasabra, drentando temporada di Winter, tin mas cu cincuenta vuelo pa dia – di cual trintidos ta bay Merca. “E ta un desafio grandi pasobra tin pre-clearance pa opera entre 9’or cu 6’or, tur vuelo cu bay Merca mester sali den e espacio ey, kiermen bo ta poniendo hopi presion riba e facilidadnan”, segun Benscho.
Lesa mas den TREMPAN.
