Tres sospechoso di asesinato dilanti Hues mañan

Mañan diabierna mainta tin riba rol di Corte di Prome Instancia di Aruba tin poni tres caso di asesinato. Dos ta bini dilanti Pro Forma y e otro ta wordo trata completo. Tur ta casonan cu a conmove comunidad masha y awor ta momento pa e sospechosonan tende di Hues kico ta e castigo mara na nan actonan. Prome cu esey Fiscal mester convence Hues di culpabilidad di e sospechosonan envolvi.

Pa 8.30 ta poni riba rol e caso penal contra e homber Ryson Juleano Paskel di 20 aña. Dia 2 di september 2018 el a hinca e hoben Camilo Carreño di 22 aña mortalmente riba e parkinglot patras di Sandbar. E sospechoso a huy for di e sitio y a sigui un buskeda intensivo cu a finalisa riba 30 di october ora cu el a wordo aresta. E caso aki, segun por a compronde, e procesverbaal final no ta cla ainda pa cual e ta Pro Forma. Corte lo pone un fecha nobo riba cual e ta bay wordo trata.

Ryson Paskel

E di dos caso di asesinato riba rol mañan ta e asesinato di Juraima Wouters di 34 aña di edad, victima di violencia domestico. El a wordo puñala door di e homber Alexander Jeremy Jonathan Ras di 22 aña, kende tabata su compañero. E hecho aki a tuma luga dia 7 di november 2018, pues basta recien. Esaki tabata e di dos victima di violencia domestico fatal den 2018. E procesverbaal no ta cla ainda pa cual lo pone un fecha nobo pa su tratamento, cual sigur no ta prome cu luna di mei, mirando con hopi yen e sesionnan ta caba pa e próximo simannan.

Alexander Ras

E caso cu si lo wordo trata ta esun contra di Roy Croes. E ta poni riba rol pa wordo trata pa 10’or di mainta. Esaki ta e caso di Anushka Tromp, kende a wordo maltrata door di su pareha na Cunucu Abou y a fayece algun dia despues a causa di e slanan ricibi. E ta wordo acusa di a intencionalmente tuma bida di un persona riba 5 di augustus 2018 dor di dal’e varios biaha cu forza cu mokete na cabez a consecuencia di cual e persona a sufri lesionnan di cabez grave y a bin na fayece.

Roy Croes (Foto cortesia arubanative.com)

Banda di esaki tin e caso contra Olegario Ramon (of Jose Ramon) Chirinos, acusa di traficacion di hende den e periodo di 30 di april pa prome di mei 2018 y tambe riba 12 di april.