Minister Rudy Lampe, encarga cu Enseñansa, a lamenta cu no por cumpli cu e maestronan manera priminti. E aña’ki mester a bira e aña di recuperacion di e docentenan, kende na momento cu cumpli 38 aña ta keda pega financieramente. Awo cu e crisis andando, no ta logra y lo mester pospone esaki te cu un miho tempo.
E mandatario ta haya cu docentenan ta hunga un rol importante den bida di cualkier ciudadano, p’esey gobierno a dicidi di honra algun docente, cambiando nomber di algun scol pa honra docentenan local. Di e forma aki ta bay pone algun maestro como ehempel pa tur hende. Asina un scol ta bay haya e nomber di Nigel Matthew y Zuster Juliette.
Banda di esaki, tin Scol Pieter Boer pa cual tin un peticion pa cambia e nomber. Ultimo tempo tabatin hopi vandalismo cometi na e scol. E tabata un di e ultimo scolnan pa haya airco. Ta tumando mas medida di precaucion, cambiando entre otro e bentananan pa brinda mas siguridad na e instituto educativo aki.
E peticion ta pa cambia e nomber pa Scol Xander Bogaerts. E pelotero aki di Grandes Ligas (Boston Red Sox) ta ex alumno di e scol aki. Bogaerts no ta lubida su scol, ya cu e sa bishit’e regularmente ora cu e ta di bishita na su isla. Na e scol aki a yud’e den su formacion y yud’e bira grandi den mundo di deporte.
E rol cu Bogaerts ta hunga awendia ta un testimonio di su bon formacion ricibi den educacion. “Cada un tin un testimonio pa bisa cu un maestro a hunga un papel importante den nos bida. Asina ta duna den aña di recuperacion ta enfoca riba e balor cu nos maestronan a duna den nos bida.”
