Cu un caluroso aplauso, e seleccion di Aruba Karate Bond a yega Aruba bek riba diadomingo 18 di augustus ultimo despues di a participa na e campeonato di Caribe yama ‘5th Caribbean Karate Championship’.
E campeonato aki tabata uno di nivel halto y cu participacion di 143 participante di 11 pais.
Hunto e seleccion a trece 3 medaya pa Aruba di cual dos tabata di plata pa Janilaine Bello y uno di brons pa Trinity Meza Orellana. Alejandro Gonzalez Lujan a logra keda na di 5 luga den categoria “kata”.
E headcoach Alberto Gonzalez Lujan a bisa cu e ta hopi satisfecho cu e logro di e tres karatekanan aki. E campeonato tabata di un nivel bastante halto y tabata rekeri di extra esfuerzo pa e karatekanan por a keda enfoca y logra e resultado exitoso aki. Miembro di directiva di Aruba Karate Bond, esta señora Janina Werleman, tabata tin e honor di participa tambe na e congreso di e “Caribbean Karate Federation” unda a keda confirma cu Aruba lo bira e pais anfitrion y unda lo tene e di seis campeonato di Caribe den aña 2020.
Aruba Karate Bond ta contento cu e logro di e seleccion y ta convenci cu esaki ta solamente e comienzo di mucho mas logro cu ta na caminda. Aruba Karate Bond, bou di presidencia di ‘sensei’ Felix Tromp, ta felicita Janilaine Bello, Trinity Meza Orellana y Alejandro Gonzalez Lujan pa nan tremendo resultado. Un danki special tambe ta bay pa Stichting Sportsubsidie Aruba, Fundacion Lotto pa Deporte, Comite Olimpico Aruba, “Sensei” Luis Escalona, señor Aldrick Maduro (Al Performance Training), tur instructor y miembro di AKB, tur mayor, tur miembro di prensa y tur persona cu di un manera of otro ta yuda karate di Aruba.
