Diabierna anochi, net algo prome cu 11’or, a sosode un accidente cu herido riba e caminda di Playa pa Santa Cruz, net na e T-weg p’ariba di Well Well Bar & Restaurant.
Un total di tres auto tabata envolvi den e accidente aki. Un Honda CRV A-19868 cu a subi e caminda mas pabao y e chauffeur kier a lora pa bay na man robes direccion Hooiberg y for di Santa Cruz tabata biniendo Playa un Suzuki Baleno A-76534.
E tabata bin hopi duro. E chauffeur a lastra un brake pasobra e CRV a lora su dilanti. El a dal den e CRV y despues e CRV a bay dal den un Hyundai A-22619 cu tabata para tambe na e T-weg pa sali.
Den e Baleno tabata tin un chauffeur cu a keda herida y den e Hyundai tambe tabata tin un señora cu e keda levemente herida, pero no a bay hospital. E chauffeur di e Baleno so a bay hospital. Tres auto total a keda envolvi y basta daño material. Takelwagen a wordo pidi pa presenta na e sitio. Personal di Nagico y Forensys tabata presente pa atende cu e accidente aki. Polis di trafico a atende tambe cu e desgracia.
