Recientemente a tuma lugar un ‘Webinar’ organisa pa Caribbean Hotel and Tourism Association unda cu varios experto den turismo incluyendo Sr. Jim Hepple (ex Presidente di AHATA) a dialoga riba e posibel recuperacion di turismo den Caribe. Pa loke ta Aruba Sr Hepple a analisa e cifranan pa Aruba den caso di diferente crisis. Entre otro a analisa 9/11, recesion di 2008 y Natalee Holloway. Por nota cu ta dura aproximadamente 3 aña pa por yega bek na e cifranan cu e isla tabata tin promer cu e crisis. Mester remarca si cu varios di e expertonan a duna di conoce cu ultimamente e sector di turismo a bira mucho mas resistente. Esaki ta significa cu e recuperacion total por ta mas promer cu e averahe di luna cu e tabata dura den pasado.
E ta keda algo hopi dificil pa por pronostica cu tur exactitud si e fecha cu e buelonan lo cuminsa bek no ta conoci. Si mira cu mayoria aerolinea a cuminsa schedule buelonan pa Aruba den luna di Mei proximo, lo por mira movecion di turista den luna di Juni y July den un forma limita. Esaki lo sosode na momento cu no extende e restriccionan actual cu Aruba tin. Mester tene na cuenta cu Merca ta nos mercado principal y aki tambe hopi hende a perde trabou. Esaki ta hasi cu e demanda pa biahenan tambe ta baha cual lo resulta den menos frecuencia di cada aerolinea. Naturalmente e por sosode tambe cu Merca mes introduci cierto restriccion cu lo afecta Aruba negativamente.
Expertonan ta mira cu aki 10 luna, nos lo por tin un nivel di turismo acceptabel.
Analisando e diferente crisis nan cu turismo a pasa aden ta nota cu tur tin un angulo diferente. Por ehempel : 9/11. E motibo principal di e caida den turismo tabata: Miedo di biaha. Si analisa e recesion di 2008, e motibo principal di e caida tabata cu e turista no tabata dispone di placa pa cosnan cu no ta esencial. E temporada di Horcan di algun aña pasa cu a causa hopi daño na varios isla den Caribe tabata tin como efecto cu no tabata tin inventario ( Cambernan di Hotel ). E crisis di Covid-19 tin como consecuencia e limitacion na acceso. Pues e turista no por biaha debi na restriccionan di diferente pais.
Sr Hepple kende actualmente ta e ‘Assistant Professor’ na Universidad di Aruba a traha un rapport cu ta analisa henter e situacion y tambe diferente scenario for di un bista optimista te cu un bista pesimista.
Aki por download e rapport.
Loading…
Reload document 
Open in new tab E fuente di e noticia particular aki ta un combinacion di e rapport di Sr. Hepple y e webinar cu a tuma lugar diabierna ultimo organisa pa Caribbean Hotel and Tourism Association titula : Data Insights Now and Into the Future.
