Trayekto di integridat i optimalisashon den Hustisia

Minister di Hustisia, riba djaluna 5 di Mart 2018, huntu ku hefenan di vários departamentu di e kadena hudisial, boluntariamente a pasa un tèst pa ku uso di droga. Asina e titular di Hustisia huntu ku e funshonarionan aki a pone e promé stap pa enkaminá un di e diferente trayektonan di integridat ku Minister Girigorie ta ehekutando ku e meta pa optimalisá servisio na komunidat di parti di e kadena hudisial.

Vishon riba integridat
Ku e akshon aki minister Girigorie ke manda un mensahe kla en kuantu su vishon pa ku integridat den kadena hudisial, esta ku ta importante pa tur organisashon den e kadena aki tin un imágen intachabel. Integridat ta konta pa tur empleado for di e funshonario di mas haltu te na e empleado ku ta operá den vèlt den kada organisashon. Pasobra si di parti di e komunidat ku mester keda sirbí tin deskonfiansa pa ku kualke hefe di servisio òf e personal di un organisashon ku mester ta unu ehemplar, esaki lo opstakulisá su tarea i strob’é di duna e servisio rekerí.

Hefenan di servisio
Aparte di minister Girigorie, e funshonarionan ku a someté nan mes na e tèst aki tabata señor Mauricio Sambo, señor Raymond Ellis, señor Franklin Girigorie di e tim di maneho di Kuerpo Polisial di Kòrsou, señor Medgar Elisa, hefe di Landsrecherche i e hefe suplente señor Elbert Sambo, señor Elvin Regina hefe di Brandweer Kòrsou, señor Urny Floran i señor Richinel Ricardo di Sentro di Detenshon i Korekshon Kòrsou (SDKK), señor Marlon Wernet di ’Toelatingsorganisatie’ (TO), Prokuradó General señor Roger Bos i hefe suplente di VDC. Di tur e personanan ku a someté nan mes na e tèst aki e tèst a sali negativo, pues no a konstatá uso di droga serka ningun di nan.

Den kuadro di e maneho di integridat tin vários otro proyekto, ku Minister Girigorie ta trahando riba dje. Den kaso di Polis por ehèmpel lo bai duna formashon spesial na agentenan polisial pa ku nan ’aktuashon’ den sierto kasonan i nan servisio i trato na komunidat ku e meta pa Polis yega mas serka di e komunidat. Un proyekto mas ku ya ta andando, ta e Konsulta di bario kaminda minister huntu ku polis ta drenta bario pa ta mas envolví ku e komunidat. Ta e deseo pa instalá tambe un ’Commissie Evaluatie Politieel Optreden’ (Komishon ku ta evaluá aktuashon di Polis) pa evaluá aktuashon di Polis pa ku siudadanonan i kaminda ta nesesario intermediá, rekonsiliá, disipliná i òf restorá konfiansa. E trayektonan di integridat aki lo por kana konhuntamente ku otro trayektonan ku ya ta andando.