Transaccion “dudoso” di Baby Beach Resort ta eror di Gobierno mes!

Manera 24ora.com a informa den forma di primicia e siman aki, Banco Central a alerta tur banco comercial pa tene extra cautela cu habrimento di cuenta of transacionnan di e compania Three Rivers Real Estate N.V. cu a identifica su mes como desaroyado di un hotel di 900 camber cu un inversion di 60 miyon dollar na Baby Beach. E alerta probablemente tin di haber cu informacionnan tendencioso di e grupo aki of su accionistanan y posibel relacion cu Gobierno di Venezuela of cu trabounan rond di e compania nacional di petroleo. 

ADV

Aki na Aruba, den forma relampago a anuncia un hotel bou di e nomber di Baby Beach Resort y cu Apple Vacations lo oper’e y yena e cambernan. Hasta a cuminsa negocia cu un aerolinea local pa por garantisa “airlift” pa yena e cambernan di e hotel cu lo ta 600 camber “all inclusive” y 300 camber cu e formato “European Plan” cu ta e sistema tradicional di maneha hotelnan riba nos isla. 

Tereno regla den forma “rapido rapido”

Contrario na tur otro desaroyadonan, incluyendo inversionistanan local, e papeleo y maneho di tereno a bay den tempo record. A regla e permiso pa tereno y otro asuntonan den un “frega di wowo”. E liheresa aki mes a lanta tur sorto di bandera cora den e industria financiero di nos pais. 

Pago adelanta a lanta banderanan cora tur caminda

Parce cu e grupo aki, cu ta procedente directamente for di Venezuela, a manda paga Gobierno di Aruba un suma di riba 300 mil florin for di un banco den exterior. Mesora a identifica e transaccion aki como dudoso y corectamente a “reverse” e transaccion “grandi” aki pa motibo cu e compania no tabatin e permisonan necesario di Banco Central pa efectua dicho transaccion. Banconan no kier core ningun risico cu e tipo di transaccionnan asina, pasobra segun leynan existente pa combati labamento di placa y financiamento di terorismo e banconan ta obliga pa ley pa no solamente conoce esun cu ta haci e transaccion pero tambe pa sa pakico ta haci e transaccion y di unda e fondonan specifico aki ta bin. Tur banco, incluso Banco Central tin un seccion di “compliance” cu ta monitor e cumplimento cu e leynan existente pa combati practicanan ilegal.

Banconan local mester conoce nan “clientenan”

Manera menciona, banconan local mester aplica reglamentonan riba e tereno di “KYC” cu ta nifica Know Your Client y como tal mester por responsabilisa na Banco Central pa tur transaccion. Cambionan den ley di control di banconan a hinca e obligacion di control y screening den man di e banconan comercial mes, cu tin e opcion pa nenga di habri cuenta pa un cliente (specialmente internacional) si nan no ta convenci di e splicacion di e cliente for di unda e fondonan ta bin. Banconan mester por responsabilisa nan mes na Banco Central ora haci e pregunta riba cada transaccion internacional di “source of funds” y tambe “source of wealth”. 

E ultimo ta un ley nobo y ta rekeri pa e cliente por demostra e banco di Aruba, no solamente di unda e fondonan ta bin, sino tambe awo mester contesta convincentemente con a yega na e fondo aki. Mester pensa por ehempel den entrega cuentanan anual audita pa un accountant registra y reconoci. Tambe mester carta di recomendacion di banconan internacional cu kende e cliente ta trahando. 

Den e mundo di awendia, ken cu ta por tin “hopi placa”, pero poco por demostra con a yega na e fondonan aki. E leynan y normanan internacional ta traha specialmente pa combati labamento di placa y financiamento di terorismo. 

Gobierno no a ordena ni por ordena ningun screening

Contrario na locual Gobierno a informa e siman aki, esta cu ta “nos mes a manda screen e hendenan aki” NO ta cuadra cu berdad. 

Esaki pa diferente motibo;

• Gobierno no tin ningun base legal pa “screen” ningun inversionista riba aspecto financiero/economico

• Departamento di Siguridad Nacional sa haci un sorto di investigacion, pero esey ta totalmente diferente na aspecto di placa y transacionnan

• E departamento cu pronto lo mester maneha e tipo di investigacionnan asina, esta Interpol/Combatimento di terorismo, ainda no tin base legal y no autorisa pa ley pa conduci dicho investigacion

• Banco Central no ta opera riba ordo di Gobierno y den esaki tin un autoridad autonomo

• Banconan comercial tin cu conduci un “due dilegence” y raporta na Banco Central y no na Minister of Gobierno

Con a screen si ta Gobierno mes nan a paga?

Pa demostra un biaha mas cu Gobierno su declaracion no ta cuadra, ta basa riba e hecho cu e transaccion dudoso di Three Rivers tabata pa Gobierno mes! Si acaso a “screen” nan lo no a duna nan tereno mes, te pa tuma nan placa pa dicho transaccion di propiedad. Den e caso aki, Departamento di Infrastructura y Planificacion (DIP) sigur no tin ni autoridad ni poder pa investiga ningun inversionista internacional pa nan otorga terenonan prominente di nos pais. Es mas, tin empleado den DIP a crea impresion na e compania aki cu nan por cuminsa manda placa den pura, sin cu DIP mes a emiti un cobransa. Ta e urgencia aki mes awe ta bou investigacion, pasobra ta ken tin tanto pura asina pa otorga un tereno di riba 100.000 m2 na e grupo aki, cu internacionalmente ta bou investigacion na otro paisnan?

Banco Central no a rectifica nan carta

Fuentenan den Conseho di Minister a sigura cu Minister di Infrastructura a disgusta masha cu e accion di Banco Central y a pidi su colega di Finansas, pa pidi Banco Central pa hala nan carta aden y rectifica e carta mesora. Es mas, su colega Dangui Oduber (incluyendo su tata Nel Oduber) a sali cu un ofensiva contra Banco Central riba red social, mustrando nan sosten na e posicion fuerte di nan colega Otmar Oduber, den un esfuerso pa logra e proyecto aki estilo “con cu para keda”. 

Integridad?

Finalmente unda e normanan di integridad y transparencia den gobernacion ta keda? Y mas aun unda e control riba maneho di Gobierno pa medio di Parlamento ta? Acaso esunnan cu ta representa Gobierno den Parlamento a pega soño of ta haci comosifuera nan no ta mira, tende of papia?

Comments

comments