Training pa organisashonnan kon prosedé den situashon di krísis

Resientemente Direktorado di Kontrol di Riesgo i Maneho pa Kalamidat a tene un training eksitoso pa tur organisashon gubernamental enbolbí ku karnaval. E training tabata organisá pa Sektor Kultura i Deporte di Ministerio di ESKD.

Tabata presente representante di Grupo JAG, AGKK, Polis, organisashonnan ku ta forma parti di Commando Center, Fundashon Kuido Ambulans, Krus Kòrá, Brantwer, Representante di SUMUSICA (enkargá ku ponementu i kitamentu di dranghek i siguridat na dranghek), Fundashon Karnaval di Bándabou, i diferente departamento di Gobièrnu manera e.o. Ministerio di Salubridat Públiko, Medio Ambiente i Naturalesa i Ministerio di Desaroyo Ekonómiko. E training tabata bou di guia di Sr. Lesley Fer direktor dje Direktorado di Kontrol di Riesgo i Maneho pa Kalamidat, i alabes den su ròl komo Koordinador Nashonal di desaster. Meta di e training tabata pa konsientisá tur ‘stakeholder’ riba posibel senario di krísis i kalamidat ku por surgi durante marchanan di karnaval i pa sinkronisashon di akshon di tur instansia gubernamental enbolbí.

Pasobra un insidente den un grupo grandi di hende manera karnaval, por eskala rápidamente i bira un situashon di krísis, kaminda tur servisionan di emergensia i otronan mester traha konhunto pa kombatí i mitigá efektonan dje insidente. A pasa den e prosesonan krusial ku ta sumamente importante ora ta traha na nivel multidisiplinario kaminda diferente instansia tin ku traha konhuntamente durante un situashon di emergensia. Ta e intenshon ku lo tene mas tipo di enkuentronan asina den kuadro pa halsa seguridat di eventonan grandi ku ta tuma lugá na Kòrsou.