Un señora a lanta diaranson madruga y a haya holo di candela. Ora cu el a sali pafo a constata cu instalacion di Traimerdia na San Nicolas tabata na candela.
Den combersacion cu Ferdinand Ponson, vocero di Cuerpo di Bombero, el a confirma e version di e habitante di Jasmijnstraat, cu ta keda net pariba di Pieter Boerschool. Manera ta conoci, e baraknan di Traimerdia ta den e cura di e scol aki.
Ponson a splica cu e melding a drenta cu e instalacion ta tur na candela y den 4 minuut e prome tankwagen a yega na e sitio y a cuminsa combati e vlamnan. A logra domina e candela den 10 minuut pero door cu e luga ta chikito y e candela ta grandi, henter e barak a bay perdi.
Segun e habitante, pafo di e scol tabatin un pick-up para cu un chauffeur masculino, kende ta esun cu a bati alarma. Pero nan niun a mira movecionnan straño den e bisindario.
Hecho ta cu e barak a keda totalmente destrui. Na e momentonan aki no tin les tumando luga pa motibo cu ta temporada di vakantie, pero ta algo cu mester busca solucion p’e prome cu scol habri. Esaki ta algo cu por a evita si e scol tabatin seguridad, cual no ta e caso.
Segun e prome informe di Cuerpo di Bombero, tur cos ta mustra cu e candela tabata intencional.
Esaki ta bini na momento cu tin discucionnan andando riba existencia i Tramerdia. Un tempo di hopi polemica prome cu vakantie a cuminsa y cu a causa demostracion di malcontento for di sector di enseñansa.
