E trahadornan di DOMESA ta uni nan mes pa sostene cuater colega cu a haya retiro den un forma repentino diabierna. For di siman pasa tabata tin algo cu a sosode cu gerencia a tuma un decision pisa pa retira e cuater empleadonan despues di duna nan un warning. E warning segun e trahadornan ta acceptable pero un retiro ta dimas y pesey e demas coleganan a dicidi di uni pa e causa. DOMESA ta di propietarionan Venezolano. Nan a tuma e decision pa retira e cuater trahadornan den forma directo.
E problema cu a sosode ta relaciona cu un transporte di placa cu no a ser entega segun ora stipula. Ta menciona cu dialuna mainta mester a entrega 12 saco di un banco local y den e proceso di entrega a hera e entrega y keda sin hiba e 12 saconan. Despues merdia e coleganan a pasa esaki pa otro truck y coleganan a hiba e saconan cu un delay di algun ora di mainta pa merdia. E tres trahadornan y e supervisor di e dia ey ta esnan cu a ser retira. Prome a yamanan y prohibinan di yega caminda e arma y cosnan di balor ta na DOMESA. Despues diabierna a yamanan un pa un y duna nan e retiro. Aki no ta papia di perde placa nada durante ora di trabou. Mas bien segun e trahadornan, e coleganan a hera un entrega mainta y merdia esaki a tuma luga. E trahadonan ta afilia na Sindicato FTA y nan a cordina cu nan sindicato pa asina pone trabou abou.
Nan ta suppose di sali 8or di mainta riba caya. Ta drenta 7:30 AM na trabou. Dialuna mainta nan lo tey pero no pa sali pero pa protesta dos ora. Sindicato tambe lo tey cu nan. Esaki ta pa mustra nan solidaridad cu nan cuater coleganan cu ta traha riba caya y e supervisor cu a ser retira. 24ora.com tambe lo tey mainta pa asina mira con e protesta aki lo encamina y ki decision e propietarionan Venezolano lo tuma despues di duna e cuater trahadonan e retiro repentino.
