Mayoria di e trahadonan di Warda Nos Costa ta mal contento cu e maneho di Trudy Hassell ta malcontento pa e forma con e ta trata y atende cu trahadonan y hasta deteni. A bay asina leu cu trahadonan fada cu su forma dictatorial, a traha un carta cu 30 punto manda pa Minister di Husticia y pa nan sindicato SEPPA.
Por bisa, segun informacion cu 24ora.com ta dispone di dje, casi tur trahado ta di acuerdo cu e carta, ta harta di Hassell, pero pa miedo pa represalia no kier pone nan firma. Un falta di respet total pa trahadonan, cu no mag tin nan propio opinion ni critica, pasobra mesora ta tuma represalia contra nan.
E trahadonan a soporta hopi pero a yega momento cu no por wanta e problemanan interno mas, apesar di tur intento. “Nos no ta contra un forma di traha estricto y strak, pero loke nos ta contra ta e metodo dictatorial cu ta ser uza,” por lesa den e carta.
Loading...
Reload document 
Open in new tab Pa ilustra nan ponencia ora cu ta uza e palabra dictatorial nan a traha un lista di 30 punto di preocupacion unda nan ta sinti cu e hefe ta intimida y tuma represalia contra nan. Pero esaki ta apenas 30 punto, pasobra tin hopi cos mas cu nan por pone riba papel pero ta prefera pa wanta esaki pa trece dilanti den e reunion cu nan sindicato SEPPA (Sindicato di Empleadonan Publico y Priva di Aruba).
Sra. Hassell, nan ta bisa, no ta habri pa critica; nan no por expresa nan opinion sin consecuencianan negativo; ta pone nan bou presion; ta trata nan manera mucha chikito; ta intimidanan. Pero tambe nan ta cuestiona cu sra. Hassell ta bin traha cu su yiunan, kendenan ta henter dia riba tereno di WNC; trahadonan mester busca nan na scol of na cas pa hiba nan sede di GNC. Y hasta tin biaha ora cu e no t’ey, e muchanan ta keda na pia di trabou.
Ora di traha overtime ta un dolor pa nan haya e bon di cuminda y si nan mester acudi na reunion riba nan dia liber, nan no ta wordo debidamente compensa pa esaki. Ta realisa proyectonan cu ta causa cu dienstnan mester 12 ora , pero tampoco ta debidamente compensa. E forma dictatorial t’asina grandi cu nan no mag tin nan mesun opinion, ni por scoge pa e sindicato cu nan kier pasobra ta trata di pusha nan pa bay cu otro sindicato.
E ta hiba un maneho di preferencia tambe, papiando cu solamente cu esnan cu e ta gusta, ignorando e otronan y menasando di percura pa nan wordo kita of manda pa otro departamento. E departamento tin un hurista, pero e no kier haci uzo di dje pasobra e lo tin amistad cu e anterior hefe. Pero esnan cu tin hopi aña di servicio ta wordo poni un banda, pa uza esnan cu ta hiba y trece pa Hassell.
No solamente e trahadonan ta pasa malo na su man, pero e denuncianan di stranheronan cu a wordo haci entre otro via di 24ora.com ta wordo confirma den e carta cu e trahadonan a manda pa Minister Andin Bikker. Ta parce cu cacho mes ta wordo miho trata cu e stranheronan. Nan ta drumi den un situacion inhumano, tin biaha 8 persona den un camber cu ta destina pa 4 persona. Personanan cu kier pidi ta wordo desconseha door di staff pasobra e lo wordo nenga toch. Hopi cos contra ley tambe ta sosode, manera Europeo of Mericanonan cu pa un of otro motibo no por drenta e pais, ta bay cera y pidi pa firma boluntariamente un documento traha door di e personal, pa nan keda cera te ora cu nan por bandona e pais.
Pero tambe e ta laga stranheronan cera pa sali haci nan respondi sin vigilancia di personal di GNC. Si Hues Comisario duna ordo pa laga un stranhero liber, nan ta wordo deporta toch of ta laga nan liber te despues di algun dia. Y personanan cu permiso valido, ta keda deteni y nan permiso ta wordo hala aden. Pues diferente violacion di leynan ta wordo cometi door di sra Hassell, segun e carta di e trahadonan.
Aunke cu gran mayoria di e trahadonan ta di acuerdo cu contenido di e carta, pero no ta tur a firma pa miedo di represalia. Si nan ta pidi pa kita Trudy Hassell for di e puesto di director. “Nos kier un cambio rapidamente,” e trahadonan ta bisa na final di e carta.
Seppa tambe a manda e carta pa e Minister, pidiendo un reunion mas lihe posibel.
