No obstante cu 20 miembro di Parlamento, pues cu excepcion di unicamente Daphne Lejuez, tur otro miembro di AVP, MEP, POR y RED a sostene un mocion pa traspasa 6,5 miyon florin como un sosten financiero urgente pa saca e compania di debenan existente.
A priminti cu lo pasa e suma pocopoco pero te awe, no obstante e presion di trahadonan, toch Minister di Finansa, mr. Xiomara Maduro a opta pa deliberadamente no cumpli cu deseo di Parlamento y hinca e compania den mas problema cu e ta aden caba.
Cu e decision di Minister Maduro di no pasa placa pa Serlimar, a pone cu e compania no ta den posicion pa paga nan vakantie-uitkering mescos cu tur otro empleado publico of fundacionnan of companianan estatal si a cobra e ultimo dianan aki.
Cu e realidad aki awor riba mesa, e trahadonan ta sinti cu ta hungando wega politico cu nan salario, algo cu nan no por permiti. A nota cu Minister Lopez-Tromp a ratifica e peticion di Parlamento pa extra sosten, a reuni cu Minister di Finansa pa splik’e e urgencia di e suma acorda, pero asina mes Minister Maduro no ta cumpliendo cu locual el a priminti su colega di infrastructura y medio ambiente.
Cu e sosten adicional di 6,5 miyon florin, Serlimar lo cubri e debenan di mas urgente y necesario ma e momento aki. E realidad ta cu e debe completo di e compania ta surpasa 40 miyon florin, sin cu tin perspectiva con tapa e buraco grandi ey cu e Minister anterior, e director anterior pero cu e Hunta di Supervision actual a permiti pasa bou nan wowonan.
