Trahadonan na Minister: Nos kier otro hefe na Guarda nos Costa

2032

Minister di Husticia, Andin Bikker, a reuni cu Guarda Nos Costa, KPA, CEA, sindicato SEPPA, shopstewards y trahadonan en busca di un solucion pa nan situacion. Pa basta tempo nan ta pidi e ayudo p’e situacion.

Mester sana e situacion aki mester ya cu pa basta dia mando di Guarda Nos Costa ta pidi KPA yudansa. No solamente pa loke ta trata capacidad, pero tambe p’e situacion cu tin den e luga. Vanessa Tjon-Kock, altocomisario interino di KPA, ta kere cu e mandatario a tende tur punto di trahadonan y asina aki por mira con pa sigui.

E solucion no t’ey ainda p’esey lo sigui conta cu e presencia di Cuerpo Policial, esta duna yudansa na Guarda Nos Costa. Melvin Ras, shopsteward di SEPPA, a bisa cu e mandatario a haya e mensahe for di e trahadonan di Guarda Nos Costa riba kico ta nan disgusto. Individualmente cada persona a expresa kico nan ta sinti y nan dolor di kico nan ta pasa den Guarda Nos Costa.

Minister Andin Bikker atrobe den reunion cu guarda nos costa pa un solucion

Posted by 24ora on Thursday, August 13, 2020

Nan ta spera cu e decision cu Andin Bikker ta pa tin un aire nobo pa tur trahado por ta trankil den Guarda Nos Costa. El a sigui bisa cu nan no ta descarta un mandato nobo, pasobra desde hopi tempo nan ta traha bou presion. Siman pasa Guarda Nos Costa a haci un control na Dakota y a topa hende cu nan papel no tabata na ordo.

Sindicato SEPPA a reuni cu Minister Bikker diaranson riba veiligheid di trahadonan na Dakota, unda cu mester bin cu un solucion mas pronto posibel. Edmundo Marlin, sindicalista di SEPPA, a bisa cu e trahadonan a trece padilanti nan preocupacion riba e maneho. E trahadonan ta para riba e punto cu mester drecha e centro na Dakota mas lihe posibel pa por sinti nan mes sigur.

E trahadonan a indica cu ora no tin bon comunicacion, cosnan no ta cana bon. A ripara cu e comunicacion entre leiding y trahado no ta optimal. E ta un sistema di un banda, pero e trahadonan mester sinti cu nan ta bijbetrokken riba tur cos cu ta tuma luga na Guarda Nos Costa. Esey ta trece problema interno.