Trahadonan di WEB den cuarentena ta bek na trabou mañan

2427

E trahadonan poni den cuarentena como medida di prevencion no a duna sintoma di coronavirus. Esaki ta motibo cu nan por cuminsa traha bek.

Relacionista Publico di Departamento di Salud Jurette Croes a duna e informe aki durante e conferencia di prensa di 2’or di merdia. E cantidad di personanan getest ta 267 di cual 17 ta positivo. E casonan nobo, segun por a compronde, ta anuncianan anochi door di Prome Minister Evelyn Wever Croes.

Segun Croes a splica, awe a cumpli 14 dia cu a pone e trahadonan den cuarentena y nan no a presenta ningun sintoma pa cual nan por reanuda trabou sin ningun peligro.

Un biaha mas a haci suplica na comunidad si no ta necesario, no bay den ningun luga publico. Si mester, bay un persona so y mantene distancia di 2 meter. Si bo haya griep, tabata den exterior, of tabata den contacto cu un persona positivo, bay riba e website www.arubacovid19.org

Den nomber di Hunta di Directiva di Dr. Horacio Oduber Hospital, tabata presente Freek Korver, kende a papia un poco di tur loke HOH a haci caba pa prepara nan mes caba pa COVID-19 (Coronavirus). Nan a prepara nan personal, a adapta cierto forma di traha, a busca aparatonan di respiracion adicional y awor nantin 21 disponibel pa posibel pashentnan. Pa loke ta material di proteccion, HOH tin suficiente, pero ta den contacto cu Gobierno y RIVM, debi cu e contacto no ta asina regular manera normal pa sigura cu den e proximo simannan tin suficiente material ta sigui drenta toch.

Pero tambe hospital ta sigui tur desaroyo na mundo pa mira si mester adapta protocolnan. “Si binun epidemia, hospital ta cla p’e,” Korver a expresa.

Na mesun momento el a papia di un empleado cu infecta , kende nan a saca di biaha for di circulacion na momento cu e prome sintomanan a presenta. Tur e hendenan cu tabata den contacto cun’e ta poni den cuarentena y vigila. E tabata tambe den contacto cu cinco pashentnan, pa cual a isola nan di biaha.

Hospital tin menos pashent na e momentonan aki, esey ta motibo cu por a laga algun empleado bay cas y descansa, pa si tin mester di hopi personal mas despues nan ta den optima forma.

Specialistanan

Babet la Tour, presidente di e Asociacion di Specialistanan Medico, tabata presente den e conferencia di merdia. El a splica cu hospital a prepara su persona pa trata di un bon forma tanto e pashentnan positivo di COVID-19 como e casonan sospechoso.  Pa traha di un forma sigur pa nan mes y pa otro pashentnan.

Gina Maduro di sindicato di empleadonan di cuido ABV a haci un apelacion na pueblo pa mantene su mes na reglanan mientras cu esnan cu tin sintoma, sigui e proceduranan.

Comments

comments