Trahadonan di Warda nos Costa ta pidiendo minister di husticia, Andin Bikker auxilio, pa e situacion cu nan ta bibando aden.
A yega na tal extremo cu nan no por mas y a pa e motibo aki mes, a yama un rueda di prensa pa asina urgi na e mandatario, pa e tuma accion.
Roberto Williams, Shopsteward di STA, a comenta cu a sali cu e trahadonan di Warda nos Costa pa asina demostra nan disgusto y di loke cu ta pasando na e luga.
Un di e promenan cu tin ta cu nan tin falta di personal hopi fuerte. No tin e capacidad pa maneha e cantidad di detenidonan cu nan tin cera.
Dado momento tin hopi hende cu ta trahando casi tur dia 16 ora y tin un ziektemelding hopi halto pa motibo cu e presion ta hopi na GNC.
Tin diferente punto cu a adresa y un di nan ta riba e sucedido ultimo caminda tres persona a drenta na Huis van Bewaring na Dakota, cu arma blanco y mirando cu e personal no ta arma, e personanan ta bin purba di saca nan hendenan bek. Fuera di esey siguridad ta hopi abao.
Ta compronde cu e luga ta den construccion, pero keto bay ta hayando hopi hende cu ta bin for di KIA y logicamente ta haya hendenan cu ta bin di KPA ora cu nan detene nan.
No tin problema pa tuma e hendenan, pasobra nan tin di haci nan trabao. Hendenan ilegal tin cu detene nan y ta hendenan cu no por ta riba caya, vooral esunnan di KIA. Pero tin un problema.
GNC no tin e capacidad pa keda tuma nan, pa motibo cu no tin hende pa wak pa nan. Esey ta bira un problema pasobra nan ta mucho poco personal. Tin biaha ta haya 4 pa 5 hende ta wak pa 30 pa 40 hende y esey no por.
Awo ta pidi pa por cuminsa haya material pa por ta un tiki mas miho pa cuidanan mes. Den pasado GNC tabata tin su armanan y tabata tin mas respet. Pero awor aki cu e hendenan aki tin hopi tempo cera y e personal ta trata di haci lo miho y cuida nan miho cu por, pero debi cu frontera ta cera y no tin vuelo y e luga ta keda yena, no por keep up.
Segun Williams, mester un solucion den e parti aki. No por sigui carga e luga y no tin personal pa wak pa nan. Pesey tin tanto problema cu tin biaha hende ta scapa. Pa ora nan ta mucho riba otro, ta esey so nan por pensa pa haci.
Tin mas punto cu Williams a adresa durante di e rueda di prensa aki, entre otro overtime, capacidad di detenidonan y personal y pa e motibo aki mes ta urgi na minister di husticia pa haci algo, pasobra nan no por traha asina mas den stress.
Cada biaha e hendenan cu nan tin deteni ta bira mas agresivo, mas hopi y no por contene nan mas. Pasobra no tin personal pa wak nan.
Esey ta e fastioso di e trabao, cu tur dia ta bin den stress y no por sigui traha asina aki mas. Ta ora pa cuminsa traha trankilo pa por haci nan trabao manera debe ser.
