Trahadonan di SERLIMAR den protesta pa falta di informacion

“Nos tabatin un reunion cu Minister ayera y e no a presenta. Pesey trahadonan ta para pafo awor aki”, asina Edmundo Marlin di Sindicato SEPPA a bisa para pafo algo despues di 5:00am dilanti Serlimar den Kockstraat na San Nicolas. Ey a para cu e trahadonan den un accion cu oficialmente a cuminsa 7:00am y a caba rond di 9:00am. E accion di protesta tin como meta pa forsa un reunion cu Minister Marisol Lopez, pa haya informacion oficial di e status di Serlimar y plannan pa futuro.

Edmundo Marlin a enfatisa cu e rol di SEPPA ta pa defende interes di e trahadonan. Nan ta consciente cu trahadonan ta sinti nan mes menasa y cu chens di perde nan trabou. Ta scucha varios version den prensa y riba rednan social di plannan pa bende e compania of pa lag’e bay den bancarota. Tambe ta papia di un supuesto contract desventajoso pa e compania, di cual e Hunta di Supervision a laga par’e.

Sindicato SEPPA: Por spera escalacion den accion di trahadonan di Serlimar

Posted by 24ora on Friday, June 12, 2020

Marlin kier pa e trahadonan por haya un siguransa di nan doño di trabou, cu nan pan no ta core peliger. Awo, si sigui e noticianan saliendo di Serlimar, incluyendo un status di proteccion legal di Corte pa no bay bancarota, ta spanta e trahado. Tur tin compromisonan mensual pa cumpli cu ne, pues no ta sperando di perde nan trabou den forma abrupto.

A sinta cu Director na mesa: No por a puntr’e?
Durante entrevista cu e sindicalista, a puntr’e dicon e no a haci e preguntanan ey durante e reunion ayera. El a contesta cu nan kier scuch’e di Minister y no di ningun otro persona. Asina mes, ayera el a sinta na mesa cu Director di e compania, abogado di e compania y e Hunta di Supervision….cu ta keda e pregunta, dicon no a puntra nan mesora pa e informacion desea. Ta nan t’esun cu tin tur informacion di e situacion real den Serlimar. Asina mes, ta obvio cu e sindicato ta prefera di scucha di e Minister so.

SEPPA tin dos pechi
Ta remarcabel si cu SEPPA ta demanda pa pregunta cu de facto nan mes tin! Es mas, nan tin mas informacion cu e Minister mes, cu awor tin apenas 4 luna sinta den e funcion. E realidad ta cu SEPPA mescos cu ATIA, tin un representante den e Hunta di Supervision, den persona di Stanley Heinze. E tabata den tur negociacion, a forma parti di tur decision y tabata den e hunta durante henter 2018 y 2019 cu a aumenta gastonan di operacion di e compania, te cu Serlimar ta practicamente bancarota. Den cierto forma, SEPPA ta co-responsabel pa e mal maneho den Serlimar. No pasobra nan a maneh’e malo, sino cu a permiti e Director anterior pa deliberadamente hiba e compania na rand di bancarota.

Ex-Director di Departamento di Asuntonan Social, Stanley Heinze, awendia pensiona, ta representa sindicato SEPPA den Hunta di Supervision di Serlimar.

Hopi presion y panico den top di Serlimar
Ta conoci cu desde algun luna a cambia e Director y a apunta Anko Koopmans na cabes. E tabata director di DTI y a opta pa tuma e reto pa rescata Serlimar. Asina cu a cuminsa corta gastonan innecesario, revisa contractnan lucrativo na personanan yega na ex-Minister Otmar Oduber y reduci cantidad di trahadonan cu a drenta ultimo, cu mesora a nota cu un grupo di trahado a rabia. Ta obvio cu tin poco politica tambe hinca den e compania, den cual tin un temor pa investigacion.

Welga: Trahadonan di SERLIMAR a pone trabou abou y ta exigi claridad

Posted by 24ora on Friday, June 12, 2020

Mesora a lanta un situacion di panico den top di e compania y un tipo di ansha pa yega na documentonan of pa recupera cierto documentonan. Ta henter dia tin hende pidiendo pa documentonan, cu awor parce ta bon warda of scondi. Ta nota cu Hunta di Supervision ta culpando directiva pa mecanismonan di control mientras cu di otro banda ta benta e responabilidad bek den scochi di e directiva. Un cos ta sigur, no obstante cu a core cu e Presidente, ta evidente cu tin mas miembro di e directiva cu lo tin cu duna cuenta, sea na Parlamento, na Gobierno of incluso na un Recherche di Ministerio Publico!

Ya caba Grant Thorton a haci un investigacion den e situacion financiero di e compania y e resultado ta obvio pa tur hende: Un maneho sin pia ni cabes, aumentando gastonan den forma explosivo, sin tin entradanan pa cubri e gastonan extra aki!

Loader Loading…
EAD Logo Taking too long?

Reload Reload document
| Open Open in new tab

Download [877.52 KB]