Diamars mainta tabata tin un reunion cu e directiva nobo di Parke Nacional Arikok. Jennick Eckmeyer, shopsteward di sindicato SEPPA y trahado di e parke, a splica cu e reunion a bay basta bon. Aki nan a haya informacion di e statuut nobo, kico nan ta bay haci.
E ta splica tambe cu por a compronde cu e statuut nobo tin su partinan bon, pero toch ta haya cu nan tabata tin un combersacion cu nan over di parke mes.
Tin cosnan cu a bin ta sosode durante basta tempo, manera asuntonan di uniform, tambe e parti caminda cu e trahadonan a keda atrasa den salario.
Por a compronde cu ta bezig cu esakinan. Na momento cu a combersa, tin algo cu no a cay na agrado di e trahadonan.
Pero ta discusionnan cu tin cu tuma luga cu sindicato. Ta wardando pa nan sinta na mesa. Tin cu bay traha awo riba e CAO.
Incertidumbre
Segun Eckmeyer, pa varios aña tabata tin discusionnan ta andando cu cosnan no tabata bay bon cu e directiva anterior. Directiva a bay, uno nobo a bin. Aparentemente tin cosnan cu a sosode durante di aña, ta haya e trahadonan no ta mucho contento. Un ehempel ta a sosode un atraco cu a sosode riba un colega. A sinta cu e directiva anterior. Prome cos cu nan a haci ta yena e luga cu camara. Prome cu December algo asina a bolbe sosode. No a mira ningun siguridad pa e trahadonan.
Un colega di Eckmeyer tambe a bise cu nan ta autoridad di parke, pero no tin ningun autoridad pa duna nada. Bo ta un parkranger, bo ta cuida naturalesa berdad, pero no tin un autoridad pa para un hende of pa bisa algo. Ta algo cu ta bisa pa aña.
Kier yega na un comprondemento cu e directiva di parke, pa wak con ta resolve tur e problemanan, sino e disgusto ta keda.
Tanten cu no ta drecha e problema cu e trahadonan, e trahadonan ta keda den e mesun situacion y ta loke ta sosodiendo diamars mainta.
Sinta na mesa
Den oranan di merdia di diamars, directiva lo sinta cu sindicato SEPPA caminda cu lo traha un schedule pa por sinta cu nan na mesa pa bay discuti riba e huisreglement. Esey tambe tabata un discusion riba e cuestion di minuut, ora, uniform. Tur ta hinca den e huisreglement. Ora cu caba cu e asunto di huisreglement, e ora e siguiente paso lo bay ta pa trata e CAO. Den e CAO ta bay tin masha hopi cos, cu por ta lo por dura por lo menos un aña of un aña y mey prome cu yega na un comprondemento.
