Trahadonan di fundacionnan diahuebs mainta a acudi na Bestuurskantoor pa entrega un carta den cual ta pidi atencion di Gobierno pa loke ta e situacion indeciso cu nan ta pasando aden.
Minister di Finanza Xiomara Ruiz Maduro a baha bin tuma e carta for di trahadonan di e fundacionnan hunto cu su coleganan Dangui Oduber, di Turismo, y Andin Bikker, di Husticia.
En general ta bisa den e carta cu nan ta para tras di e lucha di indexering di e diferente sindicatonan. Y a recorda cu ta Gobierno mes cu a bin cu e regla cu ta subsidio salario di trahadonan di fundacionnan mescos cu empleadonan publico. For di momento di e prome protocol na 1996 te cu 2014 nan tabata disfruta di e sistema di indexering. E ta algo cu tur Gobierno a sigui te cu 2016 ora cu a cambia e sistema di subsidio pa output-subsidie y a mustra Gobierno cu no por kita nan derechonan den forma unilateral.
Ta menciona cu nan tambe ta haya e premienan adicional, cu ta algo cu a keda palabra a base di negociacionnan di sindicatonan ora cu mester a otorga indexering. E representante di e trahadonan a finalisa lesando e carta cu grito di “indexering awo”. Y el a bisa cu nan ta aprecia si nan por haya un contesta na momento cu nan yega na mesa pa negocia esaki.
Minister Oduber, kende a tuma e carta, a informa cu ta bay discuti e documento den Conseho di Minister, den e espacio financiero limita cu nan tin pa maneha. Y a recorda cu Prome Minister di Aruba na e momento ey ta na Hulanda pa discuti e aanwijzing hustamente pa e situacion financiero existente y cu nan a hereda. “E no ta un situacion facil cu nos mester deal cun’e. Pero sigur nos tin oido pa e peticion aki y lo discutie tambe.”
Minister di Finanza di su banda tambe a papia riba e situacion financiero di Aruba, cu ta e motibo cu Prome Minister Wever Croes ta na Hulanda awe. El a recorda cu nan mester construi un pais y esaki ta trece hopi reto cun’e. Esaki ta trece cun’e cu tin biaha tin cu tuma decisionnan, cu den bista di hopi hende, no ta decisionnan popular. “Bo no por kibra un pais, mester construi esaki. Cu e pensamento ey nos ta traha,” el a bisa.
