Trahadonan di DVG ta sinti falta di TOPA

Ta parce cu asina cu tin un keho contra maneho di Gobierno, cu mesora e sindicato TOPA ta bira “missing in action”. Por lo menos esey tabata opinion di algun trahado di DVG awe mainta pafo di e edificio di DV y despues na e manifestacion na Bestuurscollege. E empleadonan ta keha di no tin un luga adecua pa por traha, pa 1 aña y 8 luna caba. Minister Dangui Oduber ta na altura di e problema pero pa un of otro motibo no tin fin di regla un solucion, apesar di hopi promesa den e ultimo lunanan aki.

Locual mas e trahadonan a keha awe ta e falta di interes of sosten di nan sindicato, esta TOPA. Separa di e presidente, nan shopsteward of delegado, esta Jayburt Dijkhoff, cu tanto a purba lanta trahadonan contra e Director Jerry Staring, awe no tabata ni presente pa sali pa derecho di e trahado. Algun di nan a hasta expresa cu Dijkhoff a gaña bringa un guera politico cu despues a yud’e yega na e funcion temporal di coordinador di Minister Dangui Oduber, probablemente cu 25% di aumento di salario, mescos cu tur otro ta haya ora bay na disposicion di un mandatario.

“E hendenan aki ta fix nan mes y ta lubida riba nos pobernan. Nos ta sinta cu un grupo grandi di hende den koffiekamer of den vergaderzaal sin oficina, sin luga drechi pa traha. Nan ta den Cocolishi cu auto di Gobierno y aumento di salario, bo ta kere nan ta worry cu nos?”, asina un di e trahadonan a expresa cu un disgusto riba su cara.

E mundo sindical ta pasando den un transformacion grandi e ultimo añanan aki. Na dado momento a crea un percepcion cu e sindicatonan, cu sanger nobo, a logra penetra den hopi departamento y compania. Pero hopi ta haya representacion pero no ta yega nunca na un CAO pasobra ta priminti trahadonan cosnan cu no por cumpli despues. Den e aparato gubernamental ta notando esaki tambe, unda politica a penetra den sindicalismo. E bon di esaki ta cu e trahadonan ta notando e desaroyo aki y ta mirando claramente cu e sindicatonan liga politicamente mesora ta bin abou lihe pa esunnan cu berdaderamente ta lucha pa trahado, sea cual sea asignatura di Gobierno, ta keda progresa y crece den miembrecia.

Comments

comments