Trahadonan di DOMESA a dicidi cu dialuna, nan no ta bay traha. E motibo cu nan no ta bay traha ta, cu nan ta para firme cu cuater colega cu a wordo retira, cu segun nan, ta inhusto. Nan ta para cu nan coleganan.
Mientras tanto gerencia a manda busca hende for di Corsou, cu aparentemente lo a bin tambe na e oficina.
Sindicato FTA tabata tey presente. Trahadonan ta para duro y ta bisa cu si permiti nan kita cuater trahado den un solo tiro, esey ta nifica cu mañan nan trabao tambe ta core na peliger.
Tyron Bremo di FTA, a splica cu e sindicato ta contra di e retiro cu a tuma luga. Ta contra di e forma cu el a pasa, pasobra cu na ningun momento e compania no a envolvi e sindicato den e desicion.
A lanta riba diasabra y bisa cu ta nan ultimo dia di trabao. Ta trata di cuater persona cu tin hopi aña di servicio. Trahadonan cu a mustra nan lealtad y seriedad na e compania pa hopi tempo. Esey no ta manera, no ta traha trahadonan asina. Cualkier cu lo por ta e motibo, tin otro camindanan pa cana. Pesey e protesta di dialuna mainta. Ta pesey e descontento.
Intencion tabata pa keda un ora, djey a sigui. Esey no ta sigui cu despues di e reunion cu a tuma luga mientras tanto, por tuma accion. No ta tuma e decision di e compania sin mas.
A bin representantenan di Corsou y ta spera cu por soluciona esaki pa e problema no sigui escala.
No mester a yega asina leu
Awor aki Aruba sa di un problema cu a surgi, siendo cu tin cosnan cu por a wordo atendi. Esey ta e problema cu tin awor aki. Esaki ta algo cu por a ten’e p’aden. E decision por tabata diferente. Por a haci otro, segun Bremo. Pero e manera cu el a wordo haci ta mentalidad di hendenan cu ta di exterior. Por ta manera cu nan ta haci nan luga, nan ta pensa cu nan por haci aki. Pero aki na Aruba tin ley y e leynan di aki mester respeta. Si bo no ta bay siña na bon, bo ta hayabo ta siña na malo, segun Bremo.
Empresa
Na momento di e walkout, e companianan cu ta afilia por a sinti nan mes afecta, debi cu nan servicio no a bin na ora. Pero despues di e propuesta, tur cos a sigui normal. Mayoria di e trahadonan a para pafo y mayoria di nan ta afilia na FTA.
Kico ta bay haci
Bremo a comenta cu e intencion ta pa e cuater personanan aki haya nan trabao bek. No ta kita hende zomaar. Of nan ta haya nan trabao, of no kier traha mas cunan, mester yega na algo. No ta lanta tuma e decision a lo loco. Tin otro forma pa cana. Manera tin. Pero asina aki no ta esey y FTA no ta acepta esey.
