Awe tempran trahadonan di siguridad di Guarda Nos Costa a dicidi cu ta basta cu tur e situacion cu nan ta pasando aden na pia di trabou na e centro di detencion di GNC. E trahadonan den accion no ta stop tanten cu e mandatario no bin wak e situacion. “Bo a trece e detenidonan aki y a trece mas candela.”
Diamars a manda tur detenido pa violacion di ley di admision y expulsion pa KIA of e centro di detencion na ex Huis van Bewaring na Dakota.
Delegado di e trahadonan di GNC Melvin Ras a splica cu nan a walkout, en espera di yegada di Minister di Husticia Andin Bikker. E mudansa di diamars di detenidonan for di e barak di FOL na aeropuerto pa ex Huis van Bewaring a bini di sorpresa pa esnan trahando na Dakota. Nan no tabata na altura di esaki ni consulta.
Segun Ras a splica, si a papia cu nan, por a mustra di biaha ki tur ta nan preocupacionnan pa e aspectonan di siguridad y treciendo mas detenido na e sitio ey no ta yuda na e situacion.
Loke nan a pidi ta pa Minister di Husticia Andin Bikker yega eynan y mira cu su propio wowonan e situacion reinante na ex HvB.
Un trahado a enfatisa cu nan tin miedo pa nan siguridad, ya cu nan no tin nada di herment drechi pa haci nan trabou debidamente. P’esey a sali pafo pa haya contestanan concreto di solucionnan y no solucion temporal. “Nos kier pa e Minister pone tur cos preto riba blanco,” e trahado Randolf Hoevertsz a bisa.
Na e sitio tin yen di material di construccion cu e detenidonan por coy y uza contra e trahadonan. E unico material di trabou cu nan tin ta nan uniform y nan pen, nada mas.
Diamars Gobierno a bisa cu a manda 16 ex preso cu ta sperando nan deportacion, bek pa KIA y a deporta 6 pa Republica Dominicana. E resto a transporta pa ex HvB. Awe sinembargo e trahado di CEA ta desmenti cu a manda 16 preso pa kia. “Nos no ta fabri y nos no ta traha tempo. Nos mester di solucion urgente.”