Gerencia di Arubus y SEPPA a sinta na mesa hunto cu Mediador di Gobierno. Aki a bin tende cu nan a haya un carta di gobierno y ordo di Hunta di Comisario cu mester corta 12.6%.
Esaki ta e linea cora pa tur departamento of empresanan di gobierno, condicion poni door di Hulanda pa Aruba por haya prestamo na cero porciento di interes.
Magaly Brito a splica cu e informacion cu nan a haya den e reunion aki cu ta bay corta salario di e trahadonan cu 12.6%. Trahadonan a mustra algun dia pasa caba cu nan no ta di acuerdo pa cual tabata na mesa negocia si ta entrega e total di 12.6% of no, y e forma.
Tambe tin un discusion e protocol existente di 2019, den cual a duna e trahadonan cierto derecho cu mester a drenta na vigor entrante prome di januari, 2021. Mester a laga haci un sondeo riba e salarionan y si e ta cuadra cu nan funcion. A base di esaki introduci e sistema nobo. Esaki ta un punto cu e trahadonan tabata kier claridad riba dje. Mester yega na un formula, pasobra e trahadonan a bin ta entregando pa algun aña caba y awo atrobe ta pidi pa entrega 12.6%.
“E discusion ta cu tur dos partido a keda para riba nan posicion. Nan ta lamenta cu gobierno a bay over na impone e medida, sin cu tabatin negociacion cu e sindicato cu ta representa e trahadonan.
Anselmo Pontilius, Mediador di Gobierno, a bisa cu SEPPA a reuni cu su miembronan y nan tin mas cu un alternativa di loke compania a presenta. Pero den e reunion a convence gerencia pa no introduci tur e medidanan cu kier bini cu nan, pasobra un grupo grandi di trahado no a bay di acuerdo cu esaki ainda. Pero e trahadonan kier combina parti di e sacrificionan di aña pasa y algun sugerencia nobo. Nan ta dispuesto pa coopera, pero kier claridad riba puntonan acorda na fin di 2019, entre otro restructuracion di salario. Pues tin dos aspecto cu mester negocia riba nan. Si compania no por introduci esaki awo, anto mester palabra ki tempo atrobe. “E ta un acuerdo y no por cambie den forma unilateral. Diabierna awo lo sinta atrobe,” Pontilius a bisa.
